«Яна больш за ўсё любіла мастацтва і прыгажосць»: выстава твораў Людмілы Кальмаевай адкрылася ў НББ

Выстава твораў Людмілы Кальмаевай «Бясконцая мяжа» адкрылася 24 верасня ў Нацыянальнай бібліятэкі Беларусі. Тут сабраны творы розных гадоў, сярод якіх графіка і жывапіс беларускай мастачкі.

Людміла Кальмаева — адна з самых цікавых сучасных мастакоў-графікаў. Яе творчасць — гэта дыялог са святлом, адлюстраванне прыгажосці ва ўсіх яе праявах. Гэта не проста карціны, а своеасаблівае акно ў душу мастачкі, дзе можна пабачыць тое патаемнае, што яна хацела данесці да гледачоў. Яна — яркая плакатыстка, даследчыца чалавечых станаў і сапраўдны жыццялюб.

У час адкрыцця выстаўкі намеснік генеральнага дырэктара Нацыянальнай бібліятэкі Беларусі Людміла Высоцкая падзялілася сваімі ўражаннямі ад карцін:

— Глядзіш на іх і дзівішся, наколькі моцным чалавекам быў іх аўтар. Карціны напісаны ў розных жанрах, і можна заўсёды падумаць, у якім настроі яна іх пісала і атрымаць уяўленне аб пачуцці душы гэтага чалавека.

Таксама свае думкі выказала і першы намеснік старшыні Беларускага саюза мастакоў, мастацтвазнаўца Наталля Шаранговіч:

— Я ведала Людмілу Міхайлаўну вельмі шмат гадоў і вось сёння на гэтай выставе здаецца, што яе асоба ажыла. Я ўспамінаю яе як вельмі эмацыянальную, вельмі тонкую ў сваіх пачуццях і гаворцы, чалавека, які быў жыццялюбам. Яна больш за ўсё любіла мастацтва і прыгажосць, а ў людзях больш за ўсё цаніла жыццярадаснасць.

Паводле слоў Наталлі Шаранговіч, дзякуючы таму, што тут сабраны карціны розных гадоў, вельмі цікава прасочваць развіццё мастачкі і паглядзець на тое, чым яна жыла.

Сапраўды, экспазіцыя атрымалася вельмі самабытнай. Тут сабраны весь творчы шлях мастачкі ад ранняй друкаванай графікі да мадэрністскіх эксперыментаў і канцэптуальных серый. Разнастайнасць жанраў і прыёмаў, універсальны сімвалізм, дэкаратыўнасць і ўсё гэта ў творах невычэрпна натхненай Людмілы Кальмаевай.

Наведаць выставу можна ў галерэі «Ракурс» да 1 снежня.

Лізавета ГОЛАД

Фота аўтара