Наша краіна апынецца пад уплывам няўстойлівай паветранай масы, таму месцамі не абыдзецца без кароткачасовых дажджоў. Пры гэтым услед за франтальным раздзелам да нас пачне паступаць халоднае паветра з паўночнага захаду Еўропы, а тэмпературны фон на наступным тыдні панізіцца, паведамілі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
У пятніцу ўмовы надвор’я ў нашай краіне будуць вызначаць атмасферныя франты, якія ссоўваюцца да нас з паўднёвага захаду Еўропы. На большай частцы тэрыторыі кароткачасовыя дажджы, днём у асобных раёнах магчымыя навальніцы. Вецер паўднёвы, паўднёва-заходні ўмераны да парывістага, удзень месцамі моцны парывісты. Тэмпература паветра ўначы будзе дастаткова камфортнай — ад 13 да 19 градусаў, а максімальная днём — 18–23 градусаў, па поўдні паветра прагрэецца да 25 цяпла.
У суботу тэрыторыя Беларусі па-ранейшаму застанецца пад уплывам атмасферных франтоў, якія ідуць да нас з боку паўднёвага захаду Еўропы. На большай частцы тэрыторыі краіны адзначацца кароткачасовыя дажджы. У асобных раёнах магчымыя навальніцы. Вецер будзе заходняй чвэрці ўмераны да парывістага, удзень у асобных раёнах моцны парывісты. Тэмпература паветра ўначы складзе ад 11 градусаў да 18 цяпла, максімальная днём — 17–23 градусаў, па паўднёвым усходзе да 25 цяпла.
У апошнюю нядзелю верасня істотна пахаладае. Будзе пераважна без ападкаў, толькі ў асноўным па паўднёвым усходзе краіны яшчэ пройдуць кароткачасовыя дажджы. Тэмпература паветра ўначы панізіцца да 5–11 цяпла, па паўднёвым усходзе да 15 градусаў. Дзённы максімум па краіне не перавысіць 10–17 градусаў.
У панядзелак пераважна без ападкаў, толькі месцамі па паўднёвым усходзе краіны кароткачасовыя дажджы. Ноччу і раніцай у асобных раёнах слабы туман. Тэмпература паветра мінімальная ноччу — 1–8 градусаў, па паўднёвым усходзе да 10 цяпла, месцамі па паўночным захадзе магчымыя замаразкі 0 — мінус 2 градусы. Максімальная тэмпература паветра днём — 10–17 градусаў.
У аўторак і сераду месцамі па краіне пройдуць кароткачасовыя дажджы. Ноччу і раніцай у асобных раёнах слабы туман. Тэмпература паветра мінімальная ноччу — 1–8 градусаў, максімальная днём — ад 10 градусаў па поўначы, да 19 градусаў па паўднёвым усходзе краіны.
Сяргей КУРКАЧ
Адкрыццё выставак і арт-аб’ектаў, важныя сустрэчы і экскурсіі, народныя гулянні і, вядома, канцэрт «Час выбраў нас».
«Я — чалавек каманды. Важна, каб людзі, якія знаходзяцца побач, верылі ў мяне».
«Наш слоган — „У нагу з часам“».
