Энцыклапедыю стварылі казачнікі

Асалоду, задавальненне выклікае ўжо толькі адзін прагляд унікальнай мастацкай кнігі пра прыроду, якая пабачыла свет у выдавецтве «Мастацкая літаратура» па заказе і пры фінансавай падтрымцы Міністэрства інфармацыі Рэспублікі Беларусь, — «Казачнай энцыклапедыі беларускага лесу». 

---

Маляўніча аформленая, яна выйшла ў серыі «Сямейнае чытанне» накладам 1500 экзэмпляраў і складаецца з паэтычных і празаічных твораў пісьменнікаў розных пакаленняў. Адрасавана кніга чытачам малодшага школьнага ўзросту. Укладальнік (а яшчэ і аўтар кароткіх прадмовак да таго ці іншага мастацкага твора) — вядомы пісьменнік Алесь Бадак. У «Казачнай энцыклапедыі...» — творы Алеся Якімовіча («Звяры нашых лясоў»), Міколы Чарняўскага («Каго баіцца зубр?»), Сяргея Грахоўскага («Ласяня»), Яраслава Пархуты («Свінтушок»), Віктара Гардзея («Лясныя парасяты», «Працавіты вожык», «Змяя і вожык»), Яраслава Пархуты («Казка пра Ваўка»), Расціслава («Дружбакі»), Рыгора Ігнаценкі («Лістапад у лесе», «У арэхах», «Грыбнік»), Анатоля Бензярука («Малінавы чай»), Алены Васілевіч («Калінавая рукавічка»), Янкі Галубовіча («Салодкі кляновік»), Васіля Віткі («Жаўна», «Дзятлік», «Крыжадзюб»), Генадзя Аўласенкі («Хто як зімуе?») і іншых паэтаў і празаікаў. Зборнік аформіла мастачка Марыся Вярцейка. Яе малюнкі настолькі цікавыя, што, як мне падаецца, іх можна нават асобна выдаваць паштоўкамі, што стане цудоўным падарункам дзеткам. 

Характар кнігі вызначаюць не толькі мастацкія творы, а яшчэ і кароткія артыкулы-прадмоўкі Алеся Бадака, які, напрыклад, перад знаёмствам ці поруч ці пасля падае інфармацыю фактаграфічнага, пазнавальнага характару. Напрыклад, следам за вершам «Дзятлік» Васіля Віткі ён расказвае пра цікавыя факты, звязаныя з жыццём дзятла, — пра дупло дзятла, яго птушанят, пра тое, як кормяць бацькі-дзятлы сваіх гадаванцаў («За суткі ... прыносяць корм да дупла 200, а то і больш разоў. Залежыць гэта не толькі ад колькасці дзяцей..., але і ад надвор’я, а таксама ад узросту птушанят»). 

 

«Казачную энцыклапедыю беларускага лесу» можна набыць у кнігарнях ААТ «Белкніга» па ўсёй краіне, а таксама ў кнігарні «Акадэмкніга» ў Мінску па адрасе: праспект Незалежнасці, 72. Прыемнага чытання! Новых вандровак — віртуальных і сапраўдных — у лясныя прасторы Беларусі!