Штогод у беларускай сталіцы і Мінскай вобласці будуецца і рэканструюецца вялікая колькасць аб’ектаў сацыяльнай інфраструктуры. Гэта ўстановы адукацыі, аховы здароўя, культуры, а таксама спартыўна-аздараўленчыя і іншыя збудаванні. Такія аб’екты ўзводзяцца ў тых месцах, дзе ёсць неабходнасць. Карэспандэнт «Звязды» высветліў падрабязнасці будаўніцтва названых аб’ектаў.
«Сёлета інвестыцыйная праграма будаўніцтва ў Мінскай вобласці даволі вялікая. Аб’ём сродкаў, які закладзены ў яе, перавышае 200 мільёнаў рублёў, — распавёў першы намеснік старшыні камітэта па архітэктуры і будаўніцтве Мінскага аблвыканкама Аляксей Быкаў. — Сярод аб’ектаў сацыяльнай інфраструктуры сёлета ўведзены будынак паліклінікі цэнтральнай раённай бальніцы ў Нясвіжы, на стадыі ўводу знаходзіцца і сучасная паліклініка ў Смалявічах. У наступным годзе будуць працягнуты будаўнічыя работы комплексу бальніцы і паліклінікі ў Заслаўі, станцыі пералівання крыві ў Барысаве. Таксама працягваецца будаўніцтва лячэбнага корпуса ў пасёлку Дружны і вялікага хірургічнага корпуса № 2 Мінскай абласной клінічнай бальніцы».
Вялікая ўвага — і будаўніцтву аб’ектаў фізічнай культуры і спорту. «Сёлета ўжо здалі два аб’екты. Гэта прыбудова будынка басейна з пешаходнай галерэяй у Мядзеле і фізкультурна-аздараўленчы комплекс у Дзяржынску. Сёння працягваецца будаўніцтва фізкультурна-аздараўленчых комплексаў у Крупках і ў вёсцы Лескаўка Мінскага раёна», — адзначыў першы намеснік старшыні.
Аляксей Быкаў расказаў і аб будаўніцтве ўстаноў адукацыі: «Узводзяцца дзіцячыя садкі ў Смілавічах і Лагойску. Плануецца таксама будаўніцтва двух дзіцячых садоў у Мінскім раёне: у Прылуках і Сеніцы. Акрамя таго, сёння ўзводзіцца пачатковая школа — дзіцячы сад у Слуцку, а яшчэ школа на 1020 месцаў у Фаніпалі. Завяршылі і ўвялі ў эксплуатацыю сярэднюю школу на 930 месцаў у Салігорску. Яна будавалася ў рамках праекта з буйнапанэльнага домабудавання, які мы будзем у далейшым прымяняць пры будаўніцтве школ на тэрыторыі Мінскай вобласці. Гэты праект выгадны па тэрмінах будаўніцтва і магчымасцях кампаноўкі пад канкрэтныя ўмовы, неабходныя ўстанове адукацыі. Таксама пачата будаўніцтва школы ў Жодзіне, праектуюцца аб’екты ў прысталічных Прылуках».
У Мінскай вобласці ўзводзяцца і аб’екты сацыяльнай абароны. Як адзначыў Аляксей Быкаў, у наступным годзе плануецца завяршэнне будаўніцтва сацыяльнага цэнтра ў Стоўбцах: «Таксама працягваецца ўзвядзенне будынка тэрытарыяльнага цэнтра сацыяльнага абслугоўвання насельніцтва ў вёсцы Бараўляны. Яго ўвод у эксплуатацыю плануецца да канца гэтага або на пачатак наступнага года. У 2025 годзе пачнецца будаўніцтва тэрытарыяльнага цэнтра сацыяльнага абслугоўвання насельніцтва ў Смалявічах».
На гэтых аб’ектах Міншчына не спыняецца. Ужо складзены перспектыўныя планы на 2025 год. «Заўважу, што аб’ём інвестыцыйных сродкаў, якія ўкладаюцца ў будаўніцтва, у наступным годзе не паменшыцца, адпаведна, тэмпы работ па ўзвядзенні сацыяльных аб’ектаў будзе захаваны», — падсумаваў Аляксей Быкаў.
На будаўніцтва аб’ектаў сацыяльнага прызначэння Мінск выдзяляе немалыя сродкі. Сёлета на ўзвядзенне аб’ектаў аховы здароўя, адукацыі, культуры, фізічнай культуры і сацыяльнай абароны будзе выдаткавана каля 460 мільёнаў рублёў. Пра гэта распавяла загадчык сектара капітальных укладанняў камітэта будаўніцтва і інвестыцый Мінскага гарвыканкама Наталля Гаўрылава.
«Сёлета былі ўведзены ў эксплуатацыю дзіцячы садок у межах вуліц Скрыпнікава — Адзінцова, школа ў мікрараёне Лябяжы. Завершана будаўніцтва найстарэйшага сталічнага кінатэатра „Перамога“, увялі ў эксплуатацыю псіханеўралагічны інтэрнат „Расток“ для дзяцей з асаблівасцямі развіцця, пажарнае дэпо ў жылым комплексе „Мінск-Свет“. Да канца года плануецца завяршыць узвядзенне інтэрната для студэнтаў БНТУ, рэканструкцыю стадыёна „Трактар“ і будаўніцтва дзіцячага садка ў Бараўлянах», — адзначыла Наталля Гаўрылава.
Па яе словах, у наступным годзе плануецца ўвод у эксплуатацыю адразу чатырох паліклінік: у пасёлку Усходні, Лошыцы і дзве ў жылым комплексе «Мінск-Свет»: «Акрамя таго, у наступным годзе плануем увесці ў эксплуатацыю аб’ект аховы здароўя на вуліцы Маякоўскага, 31, будаўніцтва якога ўжо працяглы час не можа завяршыць інвестар».
Актыўна забудоўваюцца і гарады-спадарожнікі, у першую чаргу Смалявічы. Будаўніцтва ў такіх населеных пунктах вядзецца сумеснымі намаганнямі Мінска і Мінскай вобласці. Як распавёў першы намеснік старшыні камітэта па архітэктуры і будаўніцтве Мінскага аблвыканкама Аляксей Быкаў, будаўніцтва вядзецца за кошт трансфертаў, якія паступаюць у абласны бюджэт, а заказчыкам выступае Мінск. У рамках генеральных планаў прадугледжана ўзвядзенне дзіцячых садкоў, школ у новых мікрараёнах горада.
Данііл ХМЯЛЬНІЦКІ
Фота БелТА
Карэкціроўкі па аплаце жыллёва-камунальных паслуг закрануць чатыры катэгорыі жыхароў.
