Закрыўся адзіны ў Еўропе музей Леніна

У фінскім горадзе Тамперэ закрыўся адзіны ў еўрапейскіх краінах музей Леніна. Аб гэтым перадае РИА Новости.

Музей праіснаваў амаль 80 гадоў: ён быў адкрыты ў 1946 годзе таварыствам «Фінляндыя — СССР». Выставачны комплекс размяшчаўся ў Доме рабочых, дзе ў 1905 годзе прайшла першая канферэнцыя Расійскай сацыял-дэмакратычнай рабочай партыі, на якой, у прыватнасці, упершыню сустрэліся Уладзімір Ленін і Іосіф Сталін.

У час халоднай вайны музей служыў сцэнай для дэманстрацыі ўсходняй палітыкі Фінляндыі, і ў ім паспелі пабываць усе ключавыя савецкія кіраўнікі. Пасля распаду СССР Музей Леніна стаў культавым. Ён выклікаў настальгію ў наведвальнікаў, будучы некаторы час адзіным музеем Леніна ў свеце. У 2016 годзе музей поўнасцю абнавілі: яго назва захавалася, хаця экспазіцыя змяніла фокус і засяродзілася на крытычных момантах гісторыі Савецкага Саюза.

У бліжэйшыя месяцы ў будынку ранейшага музея Леніна плануецца адкрыць новую ўстанову — музей Nootti, прысвечаны гісторыі расійска-фінляндскіх адносін.

Новая назва (у перакладзе з фінскай — нота) адсылае да так званага Нотнага крызісу 1961 года. Ён быў выкліканы дыпламатычнай нотай СССР, які патрабаваў правядзенні ваенных кансультацый з Фінляндыяй нягледзячы на яе нейтральны статус. Тым не менш фінскі прэзідэнт Урхо Кеканен пераканаў савецкага лідара Мікіту Хрушчова адмовіцца ад патрабаванняў. Разам з тым існуе меркаванне, што Нотны крызіс быў устроены для ўмацаванняў пазіцый дружалюбнага Савецкаму Саюзу Кеканена перад выбарамі.

У Тамперэ створаць сучасны музей палітычнай гісторыі, прысвечаны адносінам фінаў і рускіх, Савецкаму Саюзу і сучаснасці. Музей будзе разглядаць агульную гісторыю краін з часоў рэвалюцыі ў Расіі і набыцця Фінляндыяй незалежнасці аж да эпохі НАТА.