На мове сяброўства, даверу і падтрымкі

Як мы ўжо паведамлялі, дэлегацыя Нацыянальнага сходу Рэспублікі Беларусь на чале са Старшынёй Палаты прадстаўнікоў Ігарам Сергяенкам па запрашэнні старшыні Панафрыканскага парламента Форчуна Чарумбіры наведвае горад Мідранд у Паўночна-Афрыканскай Рэспубліцы. Ігар Сергяенка выступіў на афіцыйнай цырымоніі адкрыцця сесіі Панафрыканскага парламента. Такая магчымасць прадстаўнікам Беларусі была дадзена ўпершыню ў гісторыі, падкрэслілі ў прэс-службе Палаты прадстаўнікоў.

Як адзначыў у сваім выступленні Ігар Сергяенка, «беларусы, таксама, як і афрыканцы, ведаюць, да чаго прыводзяць спробы навязвання чужой культуры, чужых традыцый і ідэалогій. І гэтак жа беражліва ставяцца да гістарычнай памяці і спадчыны продкаў, таму што разумеюць, што ўрокі мінулага дапамагаюць будаваць лепшую будучыню. Народы, якія прайшлі складаны гістарычны шлях, заўсёды будуць размаўляць на адной мове — мове сяброўства, даверу і падтрымкі».

Ігар Сергяенка абазначыў сферы, у якіх супрацоўніцтва з Афрыканскім саюзам і рэгіянальнымі інтэграцыйнымі аб’яднаннямі бачыцца найбольш плённым. Гэта сельская гаспадарка і харчовая бяспека, прамысловасць, адукацыя, навука і тэхналогіі, энергетыка.

«Перавага супрацоўніцтва з Беларуссю ў тым, што мы гатовы пастаўляць афрыканскім партнёрам не толькі традыцыйныя экспартныя тавары, але і дзяліцца нашымі ведамі і тэхналогіямі, — адзначыў ён. — Такая мадэль ужо даказала сваю эфектыўнасць. Так, сёлета беларускі экспарт у краіны Афрыкі вырас амаль у 4 разы. За 8 месяцаў ён склаў практычна паўмільярда долараў ЗША, перавысіўшы гадавыя паказчыкі папярэдніх гадоў. Упэўнены, мы можам дабіцца большага, удзельнічаючы ў профільных панафрыканскіх і рэгіянальных праграмах».

Па словах спікера, бакам неабходна таксама каардынаваць намаганні на ўсіх узроўнях для зніжэння ўразлівасці ад рознага роду несправядлівай канкурэнцыі. Асабліва калі размова ідзе аб харчовай бяспецы. Бо на Беларусь прыпадае пятая частка сусветнага аб’ёму вытворчасці калійных угнаенняў, так неабходных для яе забеспячэння.

У Афрыцы, дзе пражывае самае маладое насельніцтва планеты, бягучы год аб’яўлены Годам адукацыі. Цяпер большасць краін гэтага рэгіёна адчувае недахоп кваліфікаваных работнікаў у галінах медыцыны, агранавукі, інфармацыйных тэхналогій, а таксама спецыялістаў сярэдняга звяна ў розных галінах эканомікі. Беларусь не на словах, а на справе дапамагае сваім афрыканскім сябрам, адзначыў Ігар Сергяенка: «У нашых установах адукацыі праходзяць навучанне грамадзяне з 33 краін Афрыканскага кантынента. Мы гатовы істотна павялічыць колькасць прыманых замежных студэнтаў. Акрамя таго, беларускі бок можа аказаць садзейнічанне ў стварэнні або ўдасканаленні сістэмы прафесійна-тэхнічнай адукацыі ў краінах Афрыкі, навучаць прыкладным, рабочым спецыяльнасцям».

У сваім выступленні Старшыня Палаты прадстаўнікоў падкрэсліў, што Беларусь ідзе ў Афрыку як сапраўдны сябар і партнёр. «Таму што беларусы, як і афрыканцы, сэрцам адданыя сваёй роднай зямлі», — сказаў Ігар Сергяенка.

На сустрэчы Старшыні Палаты прадстаўнікоў Ігара Сергяенкі са старшынёй Панафрыканскага парламента Форчунам Чарумбірам бакі адзначылі, што мэты Беларусі і краін Афрыкі шмат у чым супадаюць. Гэта мір, эканамічнае развіццё, паляпшэнне дабрабыту грамадзян і ў канчатковым выніку — рэалізацыя Мэт устойлівага развіцця.

«Мы — першачарговы голас народаў Афрыкі. Хачу пахваліць Беларусь як краіну. Мы ведаем, як шмат добрага вы зрабілі і эканамічна, і сацыяльна. Вы — вялікая краіна», — сказаў Форчун Чарумбіра.

«Беларусь праводзіць міралюбную знешнюю палітыку, паслядоўна выступае з аб’яднальнымі ініцыятывамі, накіраванымі на ўмацаванне даверу і плённае супрацоўніцтва», — адзначыў Ігар Сергяенка. Спікер падкрэсліў, што найважнейшая ініцыятыва аб глабальным дыялогу ў мэтах фарміравання новай і ўсёабдымнай сістэмы калектыўнай бяспекі належыць Прэзідэнту нашай краіны, і выказаў надзею на яе падтрымку дзяржавамі Афрыкі.

Ігар Сергяенка запэўніў, што старшыня Панафрыканскага парламента ў любы зручны для яго час можа наведаць з візітам Беларусь. У беларускім парламенце будзе сфарміравана дэлегацыя па ўзаемадзеянні з Панафрыканскім парламентам. У яе склад увойдуць кіраўнікі груп дружбы па супрацоўніцтве з парламентамі краін Афрыкі. Спікер растлумачыў, што ў Нацыянальным сходзе ўжо дзейнічаюць асобныя групы па супрацоўніцтве з парламентамі Зімбабвэ, Алжыра, Егіпта, Экватарыяльнай Гвінеі, Кеніі, ПАР і адна група дружбы з парламентамі Анголы, Лівіі, Марока, Руанды, Туніса, Судана і Уганды.

Старшыня Палаты прадстаўнікоў заявіў, што ўзаемадзеянне з Панафрыканскім парламентам як адным з важных органаў Афрыканскага саюза дазволіць прыцягнуць беларускія кампаніі да ўдзелу ў праграмах развіцця Афрыкі, прадугледжаных парадкам дня Афрыканскага саюза на перыяд да 2063 года. Ён таксама выказаў упэўненасць, што развіццю ўзаемавыгаднага супрацоўніцтва будзе садзейнічаць пашырэнне ўзаемадзеяння беларускіх і афрыканскіх парламентарыяў у міжнародных парламенцкіх арганізацыях, перш за ўсё ў Міжпарламенцкім саюзе.

Вялікая ўвага на сустрэчы была ўдзелена пытанням развіцця гандлёва-эканамічнага супрацоўніцтва. Сукупны ВУП Афрыкі складае амаль $3 трлн, што адкрывае вялікія магчымасці ў нарошчванні ўзаемавыгадных эканамічных адносін. Беларускі экспарт у краіны Афрыкі сёлета вырас амаль у чатыры разы. За восем месяцаў ён склаў амаль $1,5 млрд і перавысіў гадавыя паказчыкі папярэдніх гадоў.

Паспяхова развіваецца супрацоўніцтва з шэрагам афрыканскіх дзяржаў, у ліку якіх Зімбабвэ, дзе з 2020 года ў партнёрстве з Беларуссю рэалізоўваецца праграма механізацыі сельскай гаспадаркі. У краіну пастаўлена каля 2 тыс. беларускіх трактароў і камбайнаў. У 2022 годзе ўпершыню за апошнія 50 гадоў Зімбабвэ цалкам забяспечыла сябе збожжам. Сабраны самы вялікі ўраджай пшаніцы — 375 тыс. т. Бакі абмеркавалі магчымыя перспектывы ўдзелу нашай краіны ў сумесных праектах па здабычы карысных выкапняў, развіцці інфраструктуры, механізацыі сельскай гаспадаркі ў краінах Афрыканскага кантынента.

Бакі таксама абмеркавалі ўзаемадзеянне ў сферы адукацыйных паслуг. У мінулым навучальным годзе ў Беларусі навучаліся грамадзяне з 33 афрыканскіх дзяржаў, і ёсць намер нарошчваць супрацоўніцтва па гэтым напрамку, а таксама паглыбляць навукова-тэхнічнае ўзаемадзеянне і акадэмічнае супрацоўніцтва з Панафрыканскім парламентам, установамі адукацыі і арганізацыямі Афрыкі.

«Мы арыентаваны на прадметнае супрацоўніцтва, якое будзе насіць практычны характар. У сваім імкненні да пабудовы мірнай квітнеючай Афрыкі вы заўсёды можаце разлічваць на канструктыўнае ўзаемадзеянне з беларускімі калегамі. У нашай асобе вы будзеце мець надзейнага партнёра», — канстатаваў Ігар Сергяенка.

Падчас прэс-канферэнцыі, адказваючы на пытанне журналіста з Зімбабвэ, краіны, якая знаходзіцца пад санкцыямі больш за дваццаць гадоў, Ігар Сергяенка адзначыў: «Санкцыі разбуральна дзейнічаюць на эканомікі краін, але яны не могуць раз’яднаць людзей. Наша краіна таксама знаходзіцца пад санкцыямі. Але эканоміка развіваецца стабільна, кожны год заўважны прырост валавога ўнутранага прадукту. Санкцыі, канешне, аказваюць негатыўны ўплыў на эканоміку, але, з іншага боку, прымушаюць шукаць іншыя варыянты рэалізацыі сваёй прадукцыі, магчымасці выхаду на іншыя рынкі». Кіраўнік Палаты прадстаўнікоў асабліва падкрэсліў супрацоўніцтва з Зімбабвэ, якое актыўна развіваецца пасля візіту ў краіну Прэзідэнта Беларусі і падпісання на найвышэйшым узроўні дамоўленасцяў. Ён адзначыў, што з задавальненнем пачуў аб тым, што аграпрамысловы сектар гэтай краіны паспяхова развіваецца, што ў гэтым, напэўна, ёсць заслуга і кантактаў з Беларуссю. «Санкцыі — гэта зло, але ім можна супрацьстаяць, і прыклады таму ёсць», — рэзюмаваў Ігар Сергяенка.