«Лёсу палатно» пачыналася з прадзення

Апошнім часам значна ўзрасла папулярнасць музеяў, што цалкам заканамерна, бо захаванне памяці аб мінулым — святы абавязак нашчадкаў у імя наступных пакаленняў.

З гэтаю мэтай у нашай школе створана музейная экспазіцыя «Лёсу палатно».

Яна ўключае чатыры тэматычныя часткі. Першая — «Гісторыка-этнаграфічныя рэгіёны Беларусі ў канцы XІX — пачатку XX стст.» — распавядае аб адметнасцях падзелу тэрыторыі Беларусі на пэўныя рэгіёны, а назвы іншых гавораць самі за сябе: «Беларускі нацыянальны касцюм», «Прадзенне і ткацтва», «Куфар у вясельнай абраднасці». Экспанаты — а сёння іх колькасць набліжаецца да ста — сабраны ў розных раёнах Гродзенскай вобласці: Бераставіцкага, Ваўкавыскага, Гродзенскага, Зэльвенскага. Тут і кросны, і сукала, і мяліца, і калаўрот, і куфар, і вугальны прас, матавіла, прасніца, даматканыя і вышываныя посцілкі-ручнікі, падзоры…

Асноўным кірункам работы музейнай экспазіцыі з’яўляецца папаўненне фондаў і экскурсійная дзейнасць, а экскурсаводаў мы рыхтуем самі. Вучні школы, адзеўшы нацыянальныя касцюмы, дапамагаюць наведвальнікам дакрануцца да гісторыі нашага краю, яго самабытнасці, даўніх і новых традыцый. У ліку апошніх — правядзенне майстар-класаў, квэстаў для школьнікаў горада, уручэнне наведвальнікам (а з пачатку года іх было каля 800) памятных падарункаў — мяшочкаў-магніцікаў з ільняным насеннем.

Ёсць у нас адмысловая кніга для водгукаў, для цёплых слоў на адрас стваральнікаў і захавальнікаў яшчэ аднаго куточка беларускасці. Сярод іх — нядаўні дырэктар школы Людміла Уладзіміраўна Ніцкая, настаўніцы беларускай мовы і літаратуры Святлана Мікалаеўна Шаціло і Аксана Тадэвушаўна Бітук, педагог дадатковай адукацыі Ганна Мар’янаўна Макарчык, настаўніца пачатковых класаў Юлія Анатолеўна Барбух... Сталярныя ды многія іншыя работы выконваў Андрэй Васілевіч Слонім.

У планах энтузіястаў — заахвоціць вучняў навукова-даследчай дзейнасцю праз удзел у розных конкурсах і праектах; наладзіць партнёрскія сувязі з іншымі музеямі, стварыць новыя экспазіцыі і распрацаваць экскурсіі... А наша «Лёсу палатно» павінна стаць культурным здабыткам, які трэба прэзентаваць людзям.

Кацярына Талай, настаўніца сярэдняй школы імя А. М. Кузняцова

г. Гродна.