Беларусы Круглік і Лапаева сталі бронзавымі прызёрамі ЧС па самба

Скарбонка беларускай каманды на чэмпіянаце свету па самба, які праходзіць у Астане, папоўнілася дзвюма бронзавымі ўзнагародамі, паведамляе БелТА.

У другі дзень спаборніцтваў на п’едэстал у вагавой катэгорыі да 88 кг у мужчынскім спартыўным самба падняўся Аляксандр Круглік. На старце турніру беларус перамог украінца Андрэя Дзячэнку і Войчаха Шулінскі з ЗША, але ў чвэрцьфінале саступіў будучаму фіналісту Еламану Койшыбаеву з Казахстана. У суцяшальнай сутычцы Круглік справіўся з іарданцам Амарам Більтаві, а ў паядынку за трэцяе месца адолеў Жамалбека Асылбека з Кыргызстана.

Медалісткай спаборніцтваў у жаночым баявым самба стала Лізавета Лапаева, якая выступае ў вагавой катэгорыі да 59 кг. На стадыі адной чацвёртай фіналу беларуска была мацней туркменскай спартсменкі Мадзіны Айдагдыевай, але ў наступным раўндзе прайграла Шахзоде Азатавай з Узбекістана. Па правілах баявога самба, паядынкі за трэція месцы не праводзяцца, усе прайгралі ў паўфіналах становяцца ўладальнікамі бронзы.

Мінімум серабро сабе забяспечыла наша Анжэла Жылінская, якая дайшла да фіналу ў вазе да 72 кг, дзе пазмагаецца з расіянкай Алесяй Пасылкінай. Акрамя таго, фіналістам турніру сярод сляпых у катэгорыі да 79 кг стаў беларус Аляксандр Казлоў. Супрацьстаяць яму ў вырашальнай сутычцы будзе Віктар Рудэнка з Расіі.

Прэв’ю: БелТА