Лепшым у вывучэнні кітайскай мовы школьнікам і студэнтам Беларусі ўручана прэмія пасла Кітая за 2024 год. Цырымонія прайшла ў Беларускім дзяржаўным універсітэце фізічнай культуры (БДУФК), паведамляе БелТА.
Як адзначыў Надзвычайны і Паўнамоцны Пасол Кітайскай Народнай Рэспублікі ў Рэспубліцы Беларусь Чжан Вэньчуань, прэмія прысуджаецца для аказання дапамогі беларускай моладзі ў вывучэнні кітайскай мовы, разуменні кітайскай культуры, а таксама для ўмацавання дружбы паміж дзвюма дзяржавамі, «каб яна перадавалася з пакалення ў пакаленне». За дзевяць гадоў узнагароды ўдастоены 300 навучэнцаў.
«Прэмія пасла Кітая стала яркай візітнай карткай кітайска-беларускага супрацоўніцтва ў галіне адукацыі, — адзначыў Чжан Вэньчуань. — На сённяшні дзень больш за 50 тыс.чалавек у Беларусі маюць вопыт вывучэння кітайскай мовы. Цікавасць няўхільна нарастае. Многія навучэнцы дамагліся ўражлівых вынікаў на розных буйных міжнародных конкурсах па кітайскай мове».
Пасол пажадаў школьнікам, студэнтам, выкладчыкам далейшых поспехаў, самарэалізацыі і звярнуў увагу, што толькі вывучаючы розныя мовы можна зразумець разнастайнасць культур, рацыянальна глядзець на свет, жыць адзін з адным талерантна і прыязна.
«У апошнія гады вывучэнне кітайскай мовы і знаёмства з Кітаем сталі культурным трэндам, — сказаў Чжан Вэньчуань. — Прысутная тут моладзь нясе на сваіх плячах вялікую адказнасць за развіццё і адраджэнне краіны, нацыі, вызначае будучыню супольнасці адзінага лёсу Кітая і Беларусі».
Асобна ён падзякаваў БДУФК за арганізацыю мерапрыемства. Ліннаньскі педагагічны ўніверсітэт і БДУФК сумесна стварылі адзіны ў свеце Інстытут Канфуцыя фізічнай культуры, у якім арганічна спалучаюцца фізічнае выхаванне, традыцыйная кітайская культура і выкладанне кітайскай мовы. Тут дабіліся станоўчых вынікаў у сумесным выхаванні спецыялістаў, збліжэнні народаў і ўзаемаўзбагачэнні культуры.
Намеснік міністра адукацыі Аляксандр Кадлубай, вітаючы ўдзельнікаў цырымоніі, адзначыў, што краіны выйшлі на ўзровень усепагоднага і ўсебаковага стратэгічнага партнёрства. Аснову гэтых адносін заклалі кіраўнікі дзяржаў. «Дзякуючы іх намаганням сфарміраваны каласальны патэнцыял для развіцця двухбаковага ўзаемавыгаднага супрацоўніцтва, у тым ліку ў сферы адукацыі і маладзёжнай палітыкі. У аснове ўзаемадзеяння — акцэнт на моладзь і падрыхтоўку кадраў. З улікам рэалізацыі сумесных праектаў і нарастальнага попыту на спецыялістаў, здольных выкарыстоўваць кітайскую мову ў прафесійнай дзейнасці, надаём важнае значэнне папулярызацыі, падтрымцы, пашырэнню магчымасцяў для вывучэння кітайскай мовы», — адзначыў Аляксандр Кадлубай.
У сваю чаргу, рэктар БДУФК Сяргей Рэпкін падкрэсліў, што для ВНУ вялікі гонар у другі раз прымаць цырымонію ўручэння прэміі. «Бачым усё больш таленавітай моладзі, выкладчыкаў, якія ўносяць свой уклад у развіццё кітайскай мовы і культуры, умацоўваюць адукацыйныя і гуманітарныя сувязі паміж Кітаем і Беларуссю. Такое супрацоўніцтва адкрывае новыя перспектывы і ў сферы спорту, фізічнай культуры, турызму, спартыўнай адукацыі і навукі», — сказаў ён.
У мерапрыемстве прынялі ўдзел рэктары ўніверсітэтаў, дырэктары школ і гімназій, кіраўнікі інстытутаў Канфуцыя, настаўнікі кітайскай мовы, студэнты і школьнікі. Цырымонія суправаджалася маляўнічымі і яркімі мастацкімі нумарамі.
Прэмія пасла Кітая заснаваная ў 2016 годзе. Сёлета яна прысуджана 36 студэнтам і школьнікам. Таксама на мерапрыемстве названы імёны выкладчыкаў, удастоеных звання «Лепшы настаўнік кітайскай мовы Беларусі 2024 года», лепшыя навучальныя ўстановы, навучальныя кітайскай мове.
Прэв’ю: БелТА
Карэкціроўкі па аплаце жыллёва-камунальных паслуг закрануць чатыры катэгорыі жыхароў.
