Хатняя энцыклапедыя

Салата з сухарыкамі

Спатрэбіцца: фасоля чырвоная ва ўласным соку — 1 бляшанка; кукуруза кансерваваная — 1 бляшанка; сыр — 150 г; яйкі — 3 шт.; сухарыкі — 2 жмені; часнок, маянэз, соль і перац — на смак.

• Выкладваем фасолю і кукурузу ў міску.
• Вараныя яйкі наразаем кубікамі, здрабняем часнок.
• Надзіраем сыр на буйной тарцы.
• Усё злучаем, солім і перчым, запраўляем маянэзам.

Гатуем сухарыкі: наразаем 2-3 лустачкі хлеба маленькімі кубікамі і падсушваем на патэльні.

• Выкладваем салату ў салатнік і пасыпаем сухарыкамі.
• Пры падачы змешваем.

Яйкі, фаршаваныя бураком і селядцом

Гэта закуска не толькі вельмі смачная, але і эфектная! 

Спатрэбіцца: яйкі — 6 шт.; слабасалёны селядзец — 50 г; буракі — 100 г; зялёная цыбуля — некалькі пёрак; маянэз — 2 ст. л.; соль і перац — на смак.

• Яйкі адварыць, пачысціць і разрэзаць на палоўкі, жаўткі выняць і растаўчы.
• Вараны бурак надзерці на тарцы. Селядзец парэзаць на маленькія кубікі.
• Змяшаць бурак з жаўткамі, селядцом і дробна парэзанай зялёнай цыбуляй, дадаць маянэз.
• Палоўкі бялку запоўніць начынкай, сфармаваўшы невялікія горкі. Для большага эфекту можна для падачы палоўкі яек выкласці на лісты зялёнай салаты.

АНГЛІЙСКІ МАРКОЎНЫ ТОРТ

Спатрэбіцца: мука — 400 г; яйка — 4 шт.; цукар — 300 г; алей — 250 мл; морква — 400 г (можна зрабіць 50×50 з гарбузом); разрыхляльнік — 2 ч. л.; карыца — 2 ч. л. без горкі; ванілін — 1 пачак ці 2 ч. л. ванільнай эсэнцыі; соль — дробка; па жаданні можна дадаць жменю не вельмі дробна здробненых арэхаў (грэцкіх ці змяшаць з міндальнымі).

Для крэму і ўпрыгожвання: сметанковы сыр — 250 г; цукровая пудра — 100 г; ванілін — 0,5 пачка ці 1 ч. л. эсэнцыі, цэдра 1 лімона або апельсіна (можна замяніць на здробненыя арэхі).

• Для пачатку надзіраем моркву і гарбуз на бурачнай тарцы. Здрабняем арэхі.
• Змешваем у вялікай місцы сухія інгрэдыенты ад мукі да карыцы.
• Яйкі ўзбіць міксерам з цукрам. Патроху ўвесці алей, працягваючы мяшаць на нізкай хуткасці.
• Вадкую сумесь перакладаем у сухую (ці наадварот), змешваем, дадаём моркву з гарбузом і арэхі. Яшчэ раз змешваем. Выкладваем цеста ў форму і адпраўляем у загадзя разагрэтую духоўку хвілін на 40 пры температуры 180 °С.

Пакуль гатовы корж астуджаецца (хвілін 10), гатуем крэм.

Сметанковы сыр змешваем з цукровай пудрай і ваніллю, злёгку ўзбіваем. Корж разразаем на дзве часткі (можна гатовае цеста падзяліць і адразу спячы два каржы больш тонкія). Прамазваем першы корж, на яго ўкладваем другі і цалкам пакрываем крэмам увесь торт. Упрыгожваем цытрусавай цэдрай або здробненымі арэхамі.

Кулінарныя хітрыкі

• У ваду, у якой варыцца рыс, уліце сталовую лыжку воцату — і рыс стане беласнежны, рассыпісты.
• Калі дадаць у смятану крыху малака, яна не адкіпіць у падліўцы.
• Дробка солі, дададзеная ў каву перад канцом варкі, прыдае напою асаблівы смак і водар.

Чысцім выцяжку

Выцяжка — неабходны элемент у кожнай кухні, які дапамагае пазбавіцца ад непрыемных пахаў і пару пры гатаванні. Але з часам яна можа забівацца тлушчам і брудам, што прыводзіць да зніжэння эфектыўнасці яе работы. Для чысткі выцяжкі існуе мноства розных сродкаў, але не ўсе з іх з’яўляюцца бяспечнымі і эфектыўнымі.

1. Адным з самых папулярных і арыгінальных народных сродкаў для чысткі выцяжкі з’яўляецца сода. Трэба змяшаць яе з вадой да стану пасты і нанесці на паверхню выцяжкі. Пакінуць на 10–15 хвілін. Пасля гэтага змыць пасту цёплай вадой і выцерці выцяжку сухой анучай.
2. Яшчэ адным эфектыўным сродкам для чысткі выцяжкі з’яўляецца воцат. Трэба развесці воцат у вадзе ў прапорцыі 1:1 і нанесці на паверхню выцяжкі. Пакінуць на 10 хвілін, пасля чаго змыць цёплай вадой і працерці сухой анучай. 

Воцат дапамагае не толькі ачысціць выцяжку ад тлушчу і бруду, але і ліквідаваць непрыемныя пахі.

• Таксама цікавым сродкам для чысткі выцяжкі з’яўляецца крухмал. Для гэтага трэба змяшаць крухмал з вадой да стану густой пасты і нанесці на паверхню выцяжкі. Пакінуць на 10–15 хвілін, пасля чаго змыць цёплай вадой і працерці выцяжку сухой анучай. Крухмал не толькі чысціць выцяжку ад тлушчу і бруду, але і абараняе яе паверхню ад паўторнага забруджвання.

Такім чынам, арыгінальныя народныя сродкі для чысткі выцяжкі могуць быць не менш эфектыўныя за прамысловыя сродкі. Галоўнае — выбіраць правераныя рэцэпты і выкарыстоўваць толькі бяспечныя кампаненты для чысткі.