Сяргей Кавальчук: «Медалі беларускіх паралімпійцаў — гэта аўтарытэт краіны»

У Міністэрстве спорту і турызму ўшанавалі чэмпіёнаў і прызёраў летніх Паралімпійскіх гульняў 2024 года. Міністр спорту і турызму Сяргей Кавальчук падзякаваў спартсменам, якія прынеслі краіне медалі, а таксама тым, дзякуючы каму гэта стала магчымым — трэнерам, сябрам, балельшчыкам. 

«Асаблівую падзяку хачу выказаць Ігару Бакаму, які пацвердзіў свой клас у найскладанейшай барацьбе. Французы старанна рыхтаваліся да хатніх Гульняў, на трыбунах іх падтрымлівала велізарная колькасць людзей, упэўненых у перамозе сваіх землякоў. І вельмі прыемна было назіраць за тым, як наш спартсмен іх абгульвае», — адзначыў Сяргей Кавальчук. 

Сёлета з Парыжа медалі Паралімпійскіх гульняў прывезлі толькі плыўцы. Грашовыя сертыфікаты былі ўручаны пяціразоваму пераможцу Гульняў-2024 і 21-разоваму паралімпійскаму чэмпіёну Ігару Бакаму, новаму паралімпійскаму чэмпіёну Ягору Шчалканаву і сярэбранаму прызёру спаборніцтваў Дзмітрыю Салею. Матэрыяльна былі заахвочаны трэнеры і спецыялісты, якія ўдзельнічалі ў падрыхтоўцы спартсменаў, а таксама ўрачы і масажысты нацыянальнай каманды. Ганаровыя граматы Мінспорту атрымалі Максім Вашкевіч (плаванне) і Лізавета Дабравольская (кіданне кап’я), таксама былі ўзнагароджаны плыўцы Анастасія Зудзілава і Яўген Кавалёнак, лёгкаатлет Уладзіслаў Грыб.

Паралімпійскі чэмпіён Ягор Шчалканаў прызнаўся, што атрымліваць такія заахвочванні ад дзяржавы вельмі прыемна: «Вельмі прыемна, што нашы заслугі цэняць. Эмоцыі толькі станоўчыя яшчэ і таму, што тут сабраліся ўсе, хто быў у Парыжы — наша спартыўныя сям’я і разам падзялілі радасную нагоду».

Сяргей Кавальчук падкрэсліў, што медалі беларускіх паралімпійцаў — гэта аўтарытэт краіны, прэстыж беларускага спорту. Міністр заўважыў, што інваспорту ў Беларусі ўдзяляецца вялікая ўвага. Ён звярнуў увагу, што нядаўна ў Мінску быў адкрыты новы басейн, дзе паляпшаць сваё майстэрства будуць і плыўцы-паралімпійцы. «Перакананы, што пераможная серыя працягнецца і на наступных Гульнях у Лос-Анджэлесе праз чатыры гады», — адзначыў Сяргей Кавальчук. 

Трыўмфатар гульняў у Парыжы, 21-разовы паралімпійскі чэмпіён Ігар Бокій расказаў, што новы басейн яму спадабаўся. «Гэты аб’ект дазваляе праводзіць буйныя міжнародныя спаборніцтвы па водных відах спорту ў нашай краіне, прымаць шмат гасцей і паказваць свае лепшыя вынікі», — падкрэсліў ён. 

Валерыя СЦЯЦКО
Фота БелТА