У правінцыі Шаньсі адкрыўся музей Таосы

Музей Таосы, які прысвечаны аднайменнай археалагічнай культуры 4000-гадовай даўніны, адкрыўся ў павеце Сянфэнь правінцыі Шаньсі на поўначы Кітая, перадае «Сіньхуа».

Таоса, узрост якога складае каля 3900-4300 гадоў, з’яўляецца адным з самых уплывовых гарадзішчаў, выяўленых у басейне сярэдняга цячэння ракі Хуанхэ. Як сцвярджаюць многія эксперты, гэты археалагічны помнік звязаны з паходжаннем кітайскай цывілізацыі. З моманту пачатку раскопак у 1978 годзе на тэрыторыі руін гарадзішча была знойдзена вялікая колькасць керамічных, нефрытавых, каменных, лакавых і бронзавых вырабаў. У склад калекцыі музея ўвайшлі 230 штук і набораў культурных рэліквій.

У Музеі Таосы прадстаўлены макет гарадзішча, якое фактычна займала плошчу больш за 2,8 мільёна кв. метраў, і размешчаных у ім палаца, грамадскіх складоў, могільніка, майстэрняў і жылых пабудоў. Узвядзенне гарадзішча было ўсебакова прадумана. У ім быў збудаваны раскошны палац для багатых і аднакамерныя паўзямлянкі плошчай 10-25 кв. метраў для большасці жыхароў, што сведчыць аб прыкметнай розніцы сацыяльных статусаў і сур’ёзным грамадскім расслаенні.

Як паведаміў кіраўнік археалагічнай групы Інстытута культурных рэліквій і археалогіі Акадэміі грамадскіх навук Кітая Гаа Цзянтаа, жыхары гарадзішча ўмелі выкарыстоўваць фарбавальнікі мінеральнага паходжання, вырабляць упрыгожванні з устаўкамі з бірузы і ліцейныя формы. Гэтыя тэхналогіі перадаваліся з пакалення і пакаленне. Фарміраванне Таосы — вынік культурнага ўзаемадзеяння і зліцця паміж рэгінам сярэдняга басейна ракі Хуанхэ і іншымі суседнімі рэгіёнамі, дадаў ён.

У музеі таксама прадстаўлены экспанаты, якія, мяркуюць вучоныя, звязаны з астранамічнымі назіраннямі і хранаграфіяй. «Адкрыццё Таосы дэманструе, што ў тыя часы надышла новая важная эпоха фарміравання і развіцця кітайскай цывілізацыі. Гэтае паселішча ў раннім і сярэднім этапах ужо набыло рысы ранняга дзяржаўнага ўтварэння», — падкрэсліў кіраўнік дэпартамента археалогіі Дзяржаўнага ўпраўлення па ахове культурнай спадчыны КНР Янь Ялін.