У Беларусі вызначылі лепшага муляра

Рэспубліканскі конкурс прафесійнага майстэрства па прафесіі «муляр», арганізатарам якога выступае Беларускі прафсаюз работнікаў будаўніцтва і прамбудматэрыялаў, прайшоў на базе Баранавіцкага дзяржаўнага каледжа будаўнікоў.

Удзельнікамі працоўных спаборніцтваў сталі 14 чалавек з усіх рэгіёнаў краіны, якія ўжо дэманстравалі сваё майстэрства на адборачных этапах. На рэспубліканскім узроўні ўдзельнікам трэба было якасна і ў той жа час хутка справіцца з кладкай аркі з цэглы. Трэба адзначыць, што арка — досыць складаны элемент, які дазваляе вызначыць майстэрства ўдзельнікаў адразу па некалькіх катэгорыях.

— Мы бачым, што сёння жаданне прыняць удзел у конкурсе ёсць не толькі ў вопытных работнікаў, але і ў моладзі. Таму ўжо 4-ы год у конкурсе дзве намінацыі — сярод прафесійных работнікаў і навучэнцаў будаўнічых каледжаў. Удзел у такіх спаборніцтвах — гэта яшчэ адна магчымасць не толькі прадэманстраваць свае здольнасці, але і абмяняцца вопытам, пагутарыць з калегамі з іншых рэгіёнаў, больш даведацца аб рабоце на іншых прадпрыемствах галіны. А маладыя людзі не толькі спрабуюць свае сілы і набіраюцца вопыту, але і бачаць магчымасці свайго развіцця ў прафесіі, — адзначыў старшыня Беларускага прафсаюза работнікаў будаўніцтва і прамбудматэрыялаў Генадзь Ляпуноў.

Так, сёлета самай вялікай стала каманда брэстаўчан, якая і аказалася ў лідарах. Два першыя месцы атрымалі Арцём Госса, работнік ТАА «ЛюксМБуд» (Брэст), і Данііл Выгоўскі, навучэнец Брэсцкага каледжа будаўнікоў.

Сярод прафесійных муляроў другое месца дасталася Дзмітрыю Штаму з ААТ «Будаўнічы трэст № 9» г. Віцебска і Юрыю Дашкоўскаму (будтрэст № 14 г. Гомель). Максім Крэстапацік з Баранавіцкага каледжа будаўнікоў заняў другое месца сярод навучэнцаў.

Дыплом лаўрэата рэспубліканскага конкурсу за 3 месца атрымаў навучэнец Гомельскага дзяржаўнага каледжа будаўнікоў Ягор Пахомаў.

Трэба адзначыць, што конкурсы прафесійнага майстэрства, арганізатарамі якога традыцыйна выступаюць прафсаюзы сумесна з наймальнікамі, праводзяцца ва ўсіх галінах. Штогод удзел у іх бяруць тысячы работнікаў з усёй краіны.

Алена КРАВЕЦ