Драйверы росту — прамысловасць, будаўніцтва і гандаль

Аб гэтым заявіў прэм’ер-міністр Беларусі Раман Галоўчанка падчас пасяджэння Савета Міністраў, перадае БелТА.

«У студзені — верасні з пяці найважнейшых паказчыкаў эфектыўнасці работы ўрада і Нацыянальнага банка выканана чатыры. Забяспечана выкананне паказчыка па росце валавога ўнутранага прадукту (тэмп росту 104,5 працэнта пры прагнозе 103,4 працэнта), інвестыцый (107,6 працэнта пры плане 102,7 працэнта), рэальных даходаў насельніцтва (109,4 працэнта пры плане 103,1 працэнта). Інфляцыя — 3,8 працэнта да снежня 2023 года пры прагнозе не больш за 4,6 працэнта. 

Недавыкананы паказчык па экспарце тавараў і паслуг — тэмп росту 104,4 працэнта пры заданні 105,3 працэнта», — адзначыў Раман Галоўчанка.

Паводле яго слоў, асноўныя драйверы росту — прамысловасць, будаўніцтва і гандаль. «Усе рэгіёны ўнеслі станоўчы ўклад у фарміраванне ВУП. Лідарам застаецца Мінская вобласць. Адстае ад калег Гомельская. Гэта адзіны рэгіён, які не выканаў заданне па ВУП. Рост ёсць да мінулага года, але не той, на які мы разлічвалі», — адзначыў прэм’ер-міністр.

Усе абавязацельствы сацыяльнага характару выконваюцца своечасова і ў поўным аб’ёме, падкрэсліў кіраўнік беларускага ўрада. «У запланаваных параметрах вытрымліваецца ўзровень інфляцыі. Забяспечваецца макраэканамічная стабільнасць. За мінулы перыяд золатавалютныя рэзервы краіны павялічыліся на $800 млн і на 1 лістапада склалі $8,9 млрд. 

Расце давер насельніцтва да нацыянальнай валюты: з пачатку года выраслі тэрміновыя банкаўскія ўклады грамадзян у беларускіх рублях», — звярнуў ён увагу.

Планамерна забяспечваецца найважнейшая мэтавая задача павышэння ўзроўню жыцця насельніцтва. «У студзені — верасні рэальныя наяўныя даходы растуць хутчэй, чым планавалі. Сярэдняя зарплата па краіне дасягала Br2,2 тыс., у рэальным выражэнні гэта рост на 
13 працэнтаў. Пенсіі павялічыліся на 9,7 працэнта, сярэдні памер пенсіі склаў у верасні Br803. У бюджэтнай сферы рэальная заработная плата вырасла на 11,7 працэнта», — адзначыў Раман Галоўчанка.

За дзевяць месяцаў краіна экспартавала тавараў і паслуг на $36,7 млрд з прыростам да мінулага года на $1,5 млрд. Тэмп росту 104,4 працэнта пры заданні 105,3 працэнта. Паводле слоў прэм’ер-міністра, паказчык недавыкананы ў сувязі з многімі фактарамі, уплывам кан’юнктурных змяненняў. Разам з тым актыўна ідзе дыверсіфікацыя экспартных патокаў. 

За дзевяць месяцаў экспарт у краіны Афрыкі вырас у 3,7 раза, а колькасць афрыканскіх краін — пакупнікоў беларускай прадукцыі ўзрасла да 45.

Тэмп росту інвестыцый — 107,6 працэнта, гэта значна вышэй за прагнозны параметр. «Разам з тым застаюцца нявырашаныя пытанні. Галоўным з іх бачу я своечасовае асваенне па інфраструктурных праектах у рэгіёнах, што рэалізоўваюцца ў рамках асобных рашэнняў кіраўніка дзяржавы», — заўважыў Раман Галоўчанка.

«Калі гаварыць увогуле, то сітуацыя ў эканоміцы стабільная, кіравальная і ёсць усе шанцы закончыць год у планавых параметрах, каб перайсці да завяршальнага года пяцігодкі з добрай пазіцыяй», — рэзюмаваў кіраўнік беларускага ўрада.

Задача эканомікі Беларусі на 2025 год — расці вышэй за сусветныя тэмпы. Аб гэтым заявіў міністр эканомікі Юрый ЧАБАТАР. «Трэба апераджальнымі тэмпамі аднаўляць свой патэнцыял. Рынкі для гэтага ёсць, у тым ліку азіяцкія. Экспартныя магчымасці для нашых прадпрыемстваў у многім адкрыты. У экспарце дынаміка ў нас дадатная, асабліва, што радуе, у экспарце паслуг. Аднаўляюцца асноўныя нашы галіны. Гэта сфера транспарту, будаўнічых паслуг, адукацыі і гэтак далей. Дадатная дынаміка ў ІТ-галіне», — адзначыў Юрый Чабатар. Што датычыцца паставак тавараў за мяжу, міністр адзначыў, што ўдалося пераарыентаваць асноўныя экспартныя патокі. Больш высокімі тэмпамі растуць продажы ў краіны далёкай дугі.

Пералік рэгіянальных праектаў у рамках ініцыятывы «Адзін раён — адзін праект» плануецца пашырыць, падкрэсліў Юрый Чабатар. «Амаль 50 праектаў ужо рэалізавана ў рамках ініцыятывы „Адзін раён — адзін праект“. Да канца года мы бачым дадатную дынаміку. І, што самае галоўнае, гэта ініцыятыва не будзе спынена. Мы разглядаем ва ўрадзе ўдакладненне пераліку, ён будзе дапоўнены больш як 40 праектамі. Колькасць новых рабочых месцаў у рамках гэтых праектаў складзе амаль 11 тысяч», — адзначыў Юрый Чабатар.

Ён заўважыў, што інвестыцыі з’яўляюцца ключавым напрамкам. «Мы бачым паскарэнне росту гэтага паказчыка. Літаральна месяц таму быў тэмп 107,6 працэнта, сёння ўжо больш як 108 працэнтаў. Для нас галоўнае — якасць гэтых інвестыцый. Адзначаем павелічэнне ўкладанняў нашых прадпрыемстваў у актыўную частку. Размова ідзе аб машынах, абсталяванні. Хуткае абнаўленне садзейнічае вытворчасці канкурэнтаздольнай прадукцыі і яе пастаўцы на экспарт», — падкрэсліў міністр.