Яднанне душы і пачуццяў

DK-галерэя запрашае наведаць выставачны праект сучасных беларускіх мастачак «Humanum». У цэнтры даследавання — чалавек, яго ўзаемадзеянне з навакольным светам, унутраная барацьба з самім сабой, якая можа прывесці да трагедыі ці, наадварот, стаць крокам да лепшага жыцця.

У экспазіцыі прадстаўлены работы Ганны Лаўровай, Яўгеніі Новік, Лізаветы Янковай і Васілісы Васілеўскай. Жывапісныя і графічныя, а таксама творы, выкананыя ў змешанай тэхніцы, аб’ядноўваюць традыцыі класічнай беларускай школы і прыёмы сучаснага мастацтва.

Прастора галерэі ўвабрала багатую колеравую палітру, разнастайнасць форм і стыляў. Яркія творы Лізаветы Янковай паказваюць цесную ўзаемасувязь чалавека і прыроды. Мастачка не абмяжоўваецца адным стылем — пачуцці і эмоцыі яна адлюстроўвае з дапамогай графікі і жывапісу. «У сваёй творчасці я даследую навакольнае асяроддзе. Усё гэта перакладаю на графічную і жывапісную мову пачуццяў. Мяне цікавіць, як чалавек звязаны з прыродай і як я бачу рэальнасць, у якой знаходжуся», — апісвае мастачка свае работы.

Стыль Лізаветы Янковай набліжаны да экспрэсіянізму: парушаная кампазіцыя, яркія плямы, актыўны сюжэт, рытмічныя рухі і зламаныя лініі. Дамінантай жывапісу мастачкі з’яўляецца дыптых «Чароўная прастора» (2023), дзе часткі «Земляробства» і «Жывёлагадоўля» расказваюць доўгую гісторыю чалавецтва на шляху да панавання на Зямлі. На абедзвюх карцінах чалавек трымае ў руках сімвал сваёй перамогі — прыручаную жывёлу і кошык з садавінай. Праз творы можна прасачыць і змены ў галоўным героі. 

Пераходным этапам паміж яркімі жывапіснымі работамі графікай і аўтара з’яўляецца карціна «Singer» (2023). 

Асноўныя колеры — зялёны, жоўты, шэры, чорны і белы. Гіпербалізаваныя формы робяць акцэнт на галоўных героях. Але швейная машынка «Singer», якая дала назву твору, губляецца на фоне магутнай фігуры швачкі.

Галоўная тэма графікі Лізаветы Янковай — жаноцкасць у яе сапраўдным выглядзе. Серыя «Венеры» (2024), выкананая з дапамогай звычайнай паперы і вугалю, адлюстроўвае багіню ў тым выглядзе, як яе ўяўлялі старажытныя рымляне. Неідэальная, на першы погляд, фігура ў выкананні мастачкі становіцца эталонам прыгажосці і пачуццёвасці.

Яўгенія Новік спецыялізуецца на жанры «партрэт», які дазваляе ўбачыць асобу вачыма мастака, прасачыць асабістыя пачуцці аўтара і зазірнуць у яго душу. Партрэт расказвае пра мастака больш, чым пра саму мадэль. Яўгенія Новік працуе з рознымі колерамі і матэрыяламі. Творы «Развітанне», «Мацвей. Погляд», «Палёт. Я» выкананы з дапамогай звычайнай паперы і ручкі, з-за чаго гатовыя работы здаюцца незавершанымі. Мастачка выкарыстоўвае тэхніку «лайн-арт» — маляванне з дапамогай ліній і кропак, якія перадаюць двухмерныя і трохмерныя аб’екты. «Лайн-арт» падкрэслівае форму і контур, не абапіраючыся на колер, зацямненне і тэкстуру.

«Мае работы — гэта адлюстраванне мяне і таго, што аб’ядноўвае ўсіх нас значна больш, чым цялесная абалонка, — душы і пачуццяў. Я знаходжуся ў творчым пошуку, і ўсё, што ствараю, — гэта эксперымент. Мастацтва для мяне — спосаб спазнання свету і сябе», — піша мастачка.

Творы Васілісы Васілеўскай вельмі падобныя сюжэтам і колеравай палітрай. Яркія вогненныя абліччы адлюстроўваюць розныя пачуцці. Трыпціх «Якія гараць» (2024) адлюстроўвае ўнутраную барацьбу чалавека, супрацьстаянне супярэчлівых пачуццяў. Кожная частка паказвае розныя ступені чалавечай роспачы. Хваляванне адчуваецца ў работах «Жар» (2023) і «Camouflage» (2022).

На ўнутраных перажываннях сканцэнтравана творчасць Ганны Лаўровай. Манахромныя работы напоўнены смуткам і дэпрэсіўным настроем. Мы не бачым твараў герояў, толькі постаці — як сапраўднае ўвасабленне душэўных пакут. Пасля яркіх і экспрэсіўных твораў Васілісы Васілеўскай і Лізаветы Янковай работы Ганны Лаўровай вяртаюць у душу спакой і раўнавагу.

«Я факусіруюся на адлюстраванні меланхалічных сцэн. Даследуючы тэмы адзіноты і светлага суму, імкнуся перадаць настрой праз свае работы. Выкарыстоўваю традыцыйныя тэхнікі жывапісу і спалучаю іх з сучаснымі падыходамі. Таксама — абмежаваную палітру, каб падкрэсліць элегійны настрой, стварыць кантраст паміж святлом і ценем», — падзялілася творца.

Акрамя жывапісных і графічных твораў, можна пазнаёміцца з эскізамі, замалёўкамі мастакоў і пагартаць скетчбукі.

Выстаўка працуе да 1 снежня.

Лізавета КРУПЯНЬКОВА