Магілёў сустракае «Марафон адзінства»

Пра гэту з’яву ў горадзе нагадваюць білборды ўздоўж дарог і красамоўная чырвона-зялёная «выцінанка» на гарадскіх афішах. Рэспубліканская грамадска-культурная акцыя «Марафон адзінства» нясе магутны зарад настрою, моцных эмоцый і драйву. У такім рытме горад пачне жыць ужо заўтра — 22 лістапада.

З раніцы спікеры, артысты, блогеры, журналісты накіруюцца на заводы і ў сярэднія спецыяльныя ўстановы Магілёва, каб прыняць удзел у крэатыўных цэхавых канцэртах «Разам працуем, разам спяваем» і «НЯсумных НЯлекцыях» . Навучэнцам прапануюць інтэрактыўныя сустрэчы, стасункі з цікавымі суразмоўнікамі, сярод якіх намеснік міністра адукацыі Кацярына Пятруцкая. Яшчэ ў Бабруйску яна заўважыла, што такі фармат вельмі спадабаўся моладзі. Бо там нават няма намёку на лекцыі. Гэта стасункі па душах.

Выхаванцы Магілёўскай дзіцячай школы мастацтваў № 1 імя І.Лучанка атрымаюць карысны досвед ад музыкантаў Заслужанага калектыву Рэспублікі Беларусь Прэзідэнцкага аркестра. З імі пазаймаюцца маладыя зоркі, якія адзначаны за свае творчыя дасягненні дзяржаўнымі ўзнагародамі. 

Інклюзіўны складнік дадаецца ў праект «Адну справу робім». Калектыў магілёўскага ААТ «Ольса», якое спецыялізуецца на вытворчасці вырабаў на металічным каркасе і электратавараў, сустрэнецца з прадстаўнікамі прадпрыемства «Тыфлас» Беларускай асацыяцыі інвалідаў па зроку.

У горадзе адкрыецца адразу некалькі выставак. У гандлёвым цэнтры «Парк-Сіці» па вуліцы Мінская шаша можна будзе ўбачыць рарытэтныя плакаты са збору Нацыянальнай бібліятэкі Беларусі «Са знакам якасці», а ў МДУ імя А. Куляшова — кнігі, якія былі перададзены ў дар Прэзідэнту. У абласным мастацкім музеі імя П. Масленікава размясціцца выстава Беларускага музея гісторыі Вялікай Айчыннай вайны «Вызваленне Беларусі. Верасень 1943-1944 гады».

Запамінальнай для падлеткаў стане цырымонія ўзнагароджання пераможцаў абласных этапаў адкрытага конкурсу малюнку сярод навучэнцаў пачатковых класаў «Мы разам» і рэспубліканскага конкурсу сачыненняў на тэму «Што такое адзінства». У гарадскіх і раённых этапах конкурсу сачыненняў прыняла ўдзел болей чым 5,5 тысячы школьнікаў, у абласны трапіла толькі 69 лепшых. У конкурсе малюнкаў першапачаткова ўдзельнікаў наогул было болей чым 12,6 тысячы. На абласны этап адабрана 766 работ. Цырымонія ўзнагароджання пераможцаў адбудзецца ў Магілёўскім абласным цэнтры творчасці. Выставу малюнкаў можна будзе паглядзець тут яшчэ на працягу двух тыдняў.

Яшчэ адной знакавай падзеяй стане сустрэча ў МДУ імя А. Куляшова студэнтаў і грамадскасці з доктарам педагагічных навук, прафесарам, заслужаным дзеячам навукі Рэспублікі Беларусь Аляксандрам Радзьковым. У шчырай размове з магіляўчанамі ён закране тэму «Маё жыццё. Мой шлях. Мой Прэзідэнт».

У суботу магіляўчан чакае шмат розных забаў, канцэртаў, выстаў на пляцоўцы каля Лядовага палацу спорту. Адным з цікавых выпрабаваннем стане гарадскі квест «Гэта ўсё маё роднае», які пачнецца ў 12.00. Трэба паспець зарэгістравацца на інтэрнэт-партале «Моладзь Беларусі» (brsm.by), каб атрымаць дадатковых 20 балаў. Камандам (ад 5 да 10 чалавек) прапануецца зняць кароткі відэаролік — прызнанне ў каханні Магілёву на чыгуначным вакзале, зрабіць фатаграфію на фоне ратушы на плошчы Славы і размясціць гэтыя матэрыялы ў сваіх сацыяльных сетках і месэнджарах з хэштэгамі #МарафонАдзінства #БРСМ #ГэтаУсёМаеРоднае. Рэгістрацыя анлайн прыпыніцца за дзве гадзіны да пачатку квеста. Можна будзе зарэгістравацца і непасрэдна на пляцоўцы, але без перавагі ў 20 балаў. Усяго ўдзельнікам трэба прайсці 10 станцый і адказаць на пытанні па гісторыі Беларусі і Магілёва, беларускай мове і літаратуры, цікавых фактах аб нашай краіне і яе дасягненнях, аб знакамітых людзях — ураджэнцах беларускай зямлі, месцах і прадукцыі, якія сталі візітоўкамі краю, беларускай кухні. 

Тут жа перад лядовікам будзе працаваць мабільны музей Беларускага музея гісторыі Вялікай Айчыннай вайны «Наш доўг — помніць!» , размесціцца выстава дасягненняў айчыннага аўтапрама.

Падмацавацца можна будзе, як той казаў, не адыходзячы ад месца дзеяння. Спецыялізаваны комплекс фудтракаў, рознічнага гандлю і грамадскага харчавання прапануе аматарам смачна паесці разнастайнае меню. 

Вечарам пляцоўка пераўтворыцца ў танцавальную, дзе кіраваць настроем будзе дыджэй «Душэўнага радыё» Дзмітрый Санковіч. Арганізатары абяцаюць любімыя мелодыі і выдатны настрой. Танцы ля Лядовага палацу стануць працягам таго двухгадзіннага маштабнага канцэрту «Час абраў нас», які адбудзецца на лядовай арэне. У ім бяруць удзел вядомыя беларускія артысты і музыканты. 

Арганізатары марафона запрашаюць таксама на «Знакавую сустрэчу», якая адбудзецца 23 лістапада ў ГЦ «Атрыум». Удзел у ёй прымаюць начальнік аддзела па радыёвяшчанні «Альфа Радыё» Вадзім Шэпет, генеральны дырэктар Нацыянальнай бібліятэкі, вядомы палітолаг Вадзім Гігін, беларускі тэлежурналіст Рыгор Азаронак. Тэма сустрэчы «Хто і як фарміруе наша мысленне».

На памяць аб «Марафоне адзінства» у Магілёве застанецца мурал «Будучае Беларусі ў тваіх руках», які нанесены на адзін з дамоў па вуліцы Фаціна. Яго адкрыццё адбудзецца таксама ў суботу з удзелам першага сакратара ЦК БРСМ, сенатара Аляксандра Лук’янава. 

Нэлі ЗІГУЛЯ