У апошнія гады Кітай актыўна развівае новы напрамак у забеспячэнні харчовай бяспекі краіны — вытворчасць прадуктаў харчавання на аснове лясных рэсурсаў, перадае «Жэньмінь жыбаа» анлайн».
Па звестках Дзяржаўнага ўпраўлення лясной і стэпавай гаспадаркі КНР, гадавы аб’ём вытворчасці харчовай прадукцыі ляснога паходжання ўжо перавысіў 200 мільёнаў тон, што складае 140 кг на душу насельніцтва. Такім чынам, прадукты харчавання з ляснога сектара сталі трэцяй па значнасці крыніцай сельскагаспадарчай прадукцыі пасля збожжавых і агародніны.
У Кітаі функцыянуюць 649 нацыянальных дэманстрацыйных цэнтраў лясной эканомікі і 37 спецыялізаваных зон па вытворчасці ўнікальнай лясной сельскагаспадарчай прадукцыі. Падлесная гаспадарка штогод забяспечвае вытворчасць каля 4,9 мільярда адзінак свойскай птушкі, больш за 50 млн. галоў жывёлы, а таксама значныя аб’ёмы лясных збожжавых культур, грыбоў, садавіны і мёду.
У раёне Сіньду горада Сінтай, што ў правінцыі Хэбэй (Паўночны Кітай), наладжана маштабная вытворчасць каштанаў, якая дасягае каля 50 тысяч тон у год, а агульны абарот каштанавай прамысловасці складае амаль 630 мільёнаў юаняў (87,6 млн. долараў). Яшчэ адным прыкладам служыць алейная камелія — традыцыйная драўняная алейная культура з двухтысячагадовай гісторыяй вырошчвання ў Кітаі. Толькі сёлета за дзевяць месяцаў у краіне было закладзена 3,7 млн. му (247,3 тыс. га) новых плантацый гэтай культуры і мадэрнізавана 2,6 млн. му (176,67тыс. га) існуючых насаджэнняў.
Цяпер эксплуатацыйныя лясы вырошчваюцца больш як у 2400 паветах Кітая. Гадавы аб’ём вытворчасці прадукцыі гэтага сектара перавышае 2 трлн. юаняў (278,61 млрд. долараў), а кошт прадукцыі падлеснай гаспадаркі складае каля 1 трлн. юаняў (139,3 млрд. долараў). Гэта не толькі садзейнічае павышэнню дабрабыту мільёнаў лясных фермераў, але і стымулюе пастаяннае паляпшэнне якасці лясной харчовай прадукцыі, умацоўваючы харчовую бяспеку краіны.
«Гэта не толькі пра бізнес, але і пра чалавечыя адносіны».
«Нашы работы — жывыя, з энергетыкай любові і дабра».
