Набор на актуальныя для беларускай эканомікі спецыяльнасці «інтэлектуальная электроніка» і «міжнародная эканоміка і гандаль (з паглыбленым вывучэннем кітайскай мовы)» стартуе ў 2025/2026 навучальным годзе.
Адкрыццё спецыяльнасці «міжнародная эканоміка і гандаль (з паглыбленым вывучэннем кітайскай мовы)» — гэта вынік супрацоўніцтва эканамічнага факультэта БДУ і Рэспубліканскага інстытута кітаязнаўства імя Канфуцыя. У праграме навучання спалучаецца фундаментальная падрыхтоўка студэнтаў у галіне эканомікі і эканамічнай бяспекі з вывучэннем кітайскіх прадпрымальніцкіх традыцый. Тэрмін навучання — пяць гадоў, на працягу якіх студэнты будуць слухаць дысцыпліны ўсходазнаўчага блока, а паглыбленае вывучэнне кітайскай мовы дапаможа асвоіць прафесійную лексіку і спецыфіку дзелавой перапіскі, навучыць навыкам складання бізнес-дакументаў, пісьмовага і вуснага перакладу.
Студэнты таксама будуць даследаваць прынцыпы міжнароднага і нацыянальнага рэгулявання сучаснай эканомікі, значэнне асобных рэгіёнаў, краін і кампаній у фарміраванні тэндэнцый сусветнага гандлю, роля нацыянальных інтарэсаў у геапалітычнай абстаноўцы і інш. У час навучання студэнты атрымаюць магчымасць прайсці вытворчую практыку ў кітайскіх і беларуска-кітайскіх прадпрыемствах, стажыроўку ў КНР.
Яшчэ адзін важны момант — падрыхтоўка спецыялістаў будзе ажыццяўляцца ў непасрэдным узаемадзеянні з заказчыкамі кадраў. Па заканчэнні ўніверсітэта студэнтам прысвояць ступень магістра і кваліфікацыю «Эканаміст. Кітаязнаўца-перакладчык». Такія спецыялісты будуць запатрабаваны для работы ў дыпламатычных прадстаўніцтвах Беларусі ў Кітаі, рэспубліканскіх і мясцовых органах улады, ВНУ і навукова-даследчых установах.
Ініцыятар стварэння спецыяльнасці «інтэлектуальная электроніка» — факультэт радыёфізікі і камп’ютарных тэхналогій БДУ.
У вучэбным плане — дысцыпліны па метадах машыннага навучання, лічбавых вымяральных сістэмах, асновах асобных раздзелаў матэматыкі і фізікі (радыёэлектроніка, механіка, оптыка і тэрмадынаміка), мовах праграміравання, інтэлектуальным аналізе даных, камп’ютэрным зроку, асновах кібербяспекі і іншых.
У будучыні выпускнікі факультэта змогуць унесці свой уклад у развіццё беспілотнага транспарту, рабатызаваных вытворчасцей, «разумных гарадоў», сучасных аэракасмічных і ваенных тэхналогій.
Тэрмін навучання па новай спецыяльнасці — чатыры гады, пасля чаго студэнтам прысвояць кваліфікацыю «Радыёфізік. Інжынер-праграміст». Яны змогуць працаваць у навукова-адукацыйных установах, вядучых беларускіх і міжнародных арганізацыях і на прадпрыемствах інжынерна-тэхнічнага і IT-профілю.
Набор на абедзве спецыяльнасці будзе ажыццяўляцца на бюджэтную і платную формы навучання. Таксама разглядаецца магчымасць мэтавага набору, для якога прадугледжаны асобны ўнутраны іспыт.
Алена ВІНАГРАДАВА
Фота БДУ
«Абавязак кожнага беларуса — прагаласаваць за сваю будучыню».
Новая гісторыя гістарычнага факультэта.
Мы змаглі пераадолець наступствы заходняга санкцыйнага ціску.
Зрабіўшы якасць неад’емнай часткай іміджу Беларусі як краіны, займацца ёй неабходна пастаянна і ва ўсіх напрамках.
