Згодна з правіламі дарожнага руху, з 1 снежня да 1 сакавіка ўсе транспартныя сродкі пры ўдзеле ў дарожным руху павінны быць абсталяваны зімовымі шынамі катэгорый М1 і N1. Яны павінны ўстанаўлівацца на ўсе колы транспартнага сродку і мець адпаведную маркіроўку. Калі выкарыстоўваюцца шыпаваныя шыны, яны таксама павінны быць устаноўлены на ўсіх колах аўтамабіля.
Многія кіроўцы выкарыстоўваюць усесезонную гуму або працягваюць ездзіць на летняй. Ганна Банадык, часова выконваючая абавязкі начальніка аддзялення арганізацыі міжведамаснага ўзаемадзеяння і прапаганды бяспекі дарожнага руху галоўнага ўпраўлення ДАІ МУС, звярнула ўвагу, што летняя гума нават на сухой дарозе не выконвае ўсе свае функцыі, а пры мінусавай тэмпературы дубее і перастае трымаць кантакт з дарогай.
У нядзелю Дзяржаўтаінспекцыя пачне кантраляваць падрыхтоўку транспартных сродкаў да зімовай эксплуатацыі. Асаблівая ўвага — абсталяванню аўтамабіляў зімовымі шынамі. Таксама будзе ажыццяўляцца кантроль за спраўнасцю колаў і шын.
За ўдзел у дарожным руху транспартных сродкаў, якія не абсталяваны зімовымі шынамі, а таксама маюць няспраўнасці колаў і шын, прадугледжана адказнасць — штраф да адной базавай велічыні. Паўторнае такое парушэнне на працягу года прывядзе да штрафу ў памеры ад дзвюх да пяці базавых велічынь.
Алена КРАВЕЦ
«Гэта не толькі пра бізнес, але і пра чалавечыя адносіны».
«Нашы работы — жывыя, з энергетыкай любові і дабра».
