У Кітаі ўзрасла папулярнасць рыбалкі

У Кітаі зафіксаваны рост папулярнасці рыбалкі. Статыстыка сведчыць, што ў мінулым годзе колькасць рыбаловаў-аматараў у краіне дасягнула 150 мільёнаў чалавек, перадае «Жэньмінь жыбаа» анлайн».

З 2018-га па 2023-ці гады колькасць прыхільнікаў гэтага занятку няўхільна павялічвалася з сярэднегадавым тэмпам росту 5,9 працэнта. Паводле даных справаздачы кансалтынгавай кампаніі Frost & Sullivan, па рознічным абароце аб’ём рынку рыбалоўнага рыштунку ў Кітаі вырас з 23,4 млрд. юаняў у 2018 годзе да 31,8 млрд. юаняў летась, з сярэднегадавым тэмпам росту 6,3 працэнта. У мінулым годзе сярэднія расходы кітайскіх рыбаловаў на гэтыя тавары склалі 213 юаняў. Агенцтва прагназуе, што з 2023-га па 2028-мы гады рынак рыбалоўных прылад у Кітаі будзе працягваць расці з сярэднегадавым тэмпам 7,3 працэнта. 

Кітайская кампанія Ridge Outdoor, найбуйнейшы ў свеце вытворца тавараў для рыбалкі, штогод павялічвае сваю долю на айчынным рынку. У мінулым годзе выручка кампаніі ў Кітаі дасягнула 98,3 млн. юаняў. 

У апошнія гады рыбалка, некалі любімы занятак людзей сярэдняга і сталага веку, набірае папулярнасць сярод моладзі. Па звестках Кітайскай асацыяцыі рыбаловаў, у краіне налічваецца каля 140 млн. чалавек, якія рыбачаць не менш за чатыры разы ў год. Пры гэтым асноўную масу складаюць людзі ва ўзросце ад 25 да 44 гадоў, іх доля дасягае 46 працэнтаў, а рыбаловаў маладзейшых за 24 гады — 22%. Акрамя таго, за мінулыя чатыры гады колькасць рыбаловаў-аматараў ва ўзросце да 26 гадоў вырасла ў чатыры разы.