Тэлефонныя ашуканцы выманілі ў жыхара Наваполацка Br11 тыс.

Жыхар Наваполацка перавёў тэлефонным ашуканцам Br11 тыс. пра гэта БелТА паведамілі ва УУС Віцебскага аблвыканкама.

Зламыснік патэлефанаваў па месанджары намесніку начальніка арганізацыі і прадставіўся супрацоўнікам бяспекі вышэйстаячай арганізацыі. Ён паведаміў, што з-за ўцечкі персанальных дадзеных ёсць пагроза доступу да банкаўскага рахунку мужчыны і адразу стаў інструктаваць, як пазбегнуць фінансавых страт: неабходна перавесці ўсе зберажэнні на абаронены рахунак.

Аферыст пераканаў пацярпелага ўключыць функцыю трансляцыі экрана смартфона і запісаць у праграме для нататак персанальныя дадзеныя і нумар банкаўскай карткі. Пасля мужчыну сталі прыходзіць коды пацверджання, якія па ўказанні куратара ён таксама запісваў.

Даверлівы навапалачанін здзейсніў больш за 10 транзакцый. Калі размова з куратарам скончылася, у мужчыны спісалі буйную суму грошай.

Праваахоўнікі папярэджваюць: каб не стаць ахвярай махляроў, нельга дэманстраваць экран тэлефона староннім і выконваць па іх просьбе любыя дзеянні, якія тычацца фінансаў. Нікому нельга паведамляць асабістыя дадзеныя, паролі, коды пацверджання і іншую сакрэтную інфармацыю. Ва ўсіх сумніўных сітуацыях трэба кіравацца здаровым сэнсам і асабіста пераправяраць інфармацыю.

Прэв’ю: БелТА