ЮНІСЕФ: На дапамогу дзецям у гарачых кропках у 2025 годзе спатрэбіцца амаль 10 млрд долараў

У Дзіцячым фондзе ААН (ЮНІСЕФ) запрасілі 9,9 мільярда долараў на дапамогу 109 мільёнам дзяцей у 146 краінах, якія пацярпелі ў выніку ўзброеных канфліктаў і іншых крызісаў. Адпаведная інфармацыя размешчана на сайце Цэнтра навін ААН.

Ва ўсім свеце 213 мільёнаў дзяцей знаходзяцца ў эпіцэнтры непрадказальных надзвычайных гуманітарных сітуацый. У 2025 годзе ЮНІСЕФ плануе аказаць гуманітарную дапамогу 109 мільёнам дзяцей і заклікае выдзеліць неабходную для гэтага суму.

Выканаўчы дырэктар ЮНІСЕФ Кэтрын Расэл падкрэсліла, што сёння рэкордная колькасць дзяцей маюць патрэбу ў падтрымцы і гэты паказчык працягвае расці. «Місія ЮНІСЕФ заключаецца ў тым, каб забяспечыць кожнага з гэтых дзяцей асноўнымі відамі паслуг і прадметамі першай неабходнасці, а таксама гарантаваць абарону і выкананне іх правоў. Гэтымі прынцыпамі мы кіруемся ў нашай працы ўжо на працягу 78 гадоў», — сказала яна.

У 2024 годзе больш за 57,5 мільёна дзяцей нарадзіліся ў краінах, закранутых узброенымі канфліктамі ці іншымі гуманітарнымі крызісамі. Чакаецца, што ў 2025 годзе гэты паказчык вырасце як мінімум на 400 тысяч.

У рамках гуманітарнай дзейнасці ў 2025 годзе ЮНІСЕФ плануе:

• прадаставіць першасную медыцынскую дапамогу 56,9 мільёнам дзяцей і жанчын;
• абследаваць з мэтай выяўлення знясілення 34 мільёны дзяцей ва ўзросце 6-59 месяцаў;
• забяспечыць доступ да падтрымкі псіхічнага здароўя 20,6 мільёнаў дзяцей, падлеткаў і асоб, якія ажыццяўляюць догляд за дзецьмі;
• забяспечыць доступ да праграм па барацьбе з гендэрным гвалтам для 11,1 мільёнаў жанчын, дзяўчынак і хлопчыкаў;
• забяспечыць доступ да адукацыі для 24 мільёнаў дзяцей;
• забяспечыць доступ да чыстай вады 55,3 мільёнам чалавек;

Самыя маштабныя аперацыі ЮНІСЕФ плануе правесці ў Афганістане, Судане, Дэмакратычнай Рэспубліцы Конга, Дзяржаве Палесціна і Ліване.