Які разлік аказаўся дакладным, што павінен адчуць на сабе кожны чалавек і за што не шкада грошай

Рабочы графік Прэзідэнта штотыдзень надзвычай насычаны. І тэмы, якім кіраўнік дзяржавы надае пільную ўвагу, самыя разнастайныя: эканоміка, бяспека, сацыяльная сфера, прамысловасць, грамадска-палітычная абстаноўка і многае іншае. Кожную тэму Аляксандр Лукашэнка вывучае дэталёва, абавязкова робіць акцэнт на праблемах, але і не забывае пра станоўчыя моманты. Ацэнкі Прэзідэнта заўсёды трапныя і змястоўныя. А даручэнні і парады — канкрэтныя.

Мінулы тыдзень беларускага лідара быў напоўнены разнастайнымі мерапрыемствамі, але лейтматывам кожнага было будучае краіны. Пачаўся тыдзень з кадравых прызначэнняў. Аляксандр Лукашэнка прызначыў новых кіраўнікоў дзяржаўных органаў і арганізацый, паставіў перад імі задачы, вырашэнне якіх неабходна для развіцця краіны. З такім жа акцэнтам прайшла і сустрэча кіраўніка дзяржавы з рабочай групай па дзейнасці Нацыянальнай акадэміі навук. Другая палова тыдня была прысвечана міжнароднаму супрацоўніцтву. У Мінску прайшло пасяджэнне Вышэйшага дзяржаўнага Савета Саюзнай дзяржавы, дзе таксама шмат казалі пра перспектывы.

1. «Сёння можна ўпэўнена канстатаваць, што ў 1999 годзе наш разлік аказаўўся дакладным: толькі ў саюзнай „двойцы“ мы найбольш поўна змаглі рэалізаваць увесь назапашаны вопыт і патэнцыял на прынцыпах узаемнага даверу і партнёрства. Двухбаковыя адносіны, якія склаліся, дэманструюць магутную сілу ўзаемнага прыцягнення, якая грунтуецца на агульных мове і навукова-тэхнічнай школе, падобных ментальнасці і культурных традыцыях, нашай агульнай гісторыі. Створаны ўнікальны сусветны вопыт: „дзве краіны — дзве эканомікі — адна эканамічная прастора“. Гэты досвед правераны часам і даказаў сваю жыццяздольнасць», — адзначыў Аляксандр Лукашэнка на пасяджэнні Вышэйшага Дзяржаўнага савета ў Мінску. Свае словы ён пацвердзіў лічбамі: у параўнанні з 1999 годам значна вырас аб’ём ВУП нашых краін: у Беларусі і ў Расіі — прыкладна ў 2,5 раза. Беларуска-расійскі тавараабарот у мінулым годзе дасягнуў амаль 55 млрд. долараў. 

2. «Кожны чалавек павінен на справе, без абмежаванняў адчуць усе перавагі нашага Саюза», — заявіў беларускі лідар на пасяджэнні ВДС. Ён пералічыў напрамкі, па якіх трэба больш плённа працаваць, каб дасягнуць такой мэты. Сярод іх — транспарт і лагістыка, планаванне і пераразмеркаванне працоўных рэсурсаў, забеспячэнне бяспекі на прасторы Саюзнай дзяржавы і іншыя.

3. «З усіх мастацтваў для нас найважнейшым з’яўляецца кіно. І тое, што адбываецца ў нашым кінематографе — проста ганьба. Гэта недапушчальна. Мы скаціліся. Мы горш сталі выглядаць да таго савецкага перыяду, калі мы надавалі сур’ёзную ўвагу кінематографу. Не скажу, што тут мы ў гэтым не зацікаўлены, але чамусьці ўсе хочуць мець грошы, а на выхадзе не хочуць пагадзіцца з тым, што трэба мець добры фільм, карціну добрую. Звярніце на гэта самую сур’ёзную ўвагу», — такую задачу кіраўнік дзяржавы паставіў перад новым міністрам культуры Русланам Чарнецкім. У цэлым для назначэнцаў агульная задача — акрэсліць фронт работы і не раслабляцца, паколькі час няпросты. 

4. «Тэма для краіны — архіважная. Я ўжо сказаў: далей без навукі мы развіваць краіну не зможам. Усё, што мы маглі выціснуць інтэнсіўна і экстэнсіўна з таго, што ў нас ёсць у краіне, найперш у эканоміцы, мы ўжо зрабілі. Далей трэба развівацца, абапіраючыся на навуку. Без навукі нікуды», — заявіў Аляксандр Лукашэнка на сустрэчы з рабочай групай па дзейнасці НАН Беларусі. Ён падкрэсліў, што інвестыцыі ў навуку і тэхналогіі сталі ключавой умовай дабрабыту дзяржавы, залогам паступальнага канкурэнтнага развіцця. Па словах кіраўніка дзяржавы, Акадэмія навук не стала драйверам апераджальнага навукова-тэхнічнага развіцця краіны на цяперашнім этапе. Таму на гэты аспект трэба ўдзяліць самую пільную ўвагу.

5. «Можа быць, у нас сапраўды дактары і акадэмікі, кандыдаты зарабляюць не тую заработную плату, трэба ім павялічыць яе ў пяць разоў (не ведаем толькі, дзе грошы знайсці). Мы зыходзілі з таго, што павінен быць вынік. І за вынік ні ў якім разе нельга шкадаваць грошай», — так адказаў Прэзідэнт на прапановы плаціць навукоўцам такую ж зарплату, як і шахцёрам. Разам з тым, беларускі лідар звярнуў увагу, што грошай на навуку не шкада, але найперш павінен быць практычны вынік. 

Валерыя СЦЯЦКО