Сотні прабірак са смяротнымі вірусамі зніклі з лабараторыі ў Аўстраліі

Сотні прабірак са смяротнымі вірусамі зніклі з лабараторыі ў Аўстраліі пасля парушэння"пратаколаў біялагічнай бяспекі«. Пра гэта паведамляе БелТА са спасылкай на Newsweek.

Міністр аховы здароўя Квінслэнду заявіў, што 323 узоры жывых вірусаў, уключаючы вірус Хендра, лісавірус і хантавірус, зніклі ў 2021 годзе ў выніку «сур’ёзнага парушэння пратаколаў біялагічнай бяспекі».

Аднак згуба была выяўленая толькі ў жніўні 2023 года. Адзначаецца, што амаль 100 са зніклых прабірак утрымлівалі вірус Хендра, які з’яўляецца смяротным. Дзве прабіркі ўтрымлівалі хантавірус, а 223 флакона — узоры лісавіруса.

Вірус Хендра быў упершыню выяўлены ў сярэдзіне 1990-х гадоў. Ён пераносіцца кажанамі і выклікае смяротную інфекцыю ў коней і людзей. У матэрыяле адзначаецца, што лятальнасць віруса складае 57%.

Хантавірус пераносіцца грызунамі і можа выклікаць хантавірусны лёгачны сіндром, смяротнасць ад якога складае каля 38%. Лісавірус падобны на шаленства і мае вельмі высокі ўзровень смяротнасці.

Супрацоўнікі лабараторыі не змаглі растлумачыць, што стала з узорамі вірусаў. Як высветлілася, прабіркі зніклі пасля таго, як зламалася маразільная камера ў вірусалагічнай лабараторыі, у якой яны захоўваліся.

Як мяркуецца, іх перамясцілі ў працуючую маразільную камеру без афармлення адпаведных дакументаў. «Матэрыялы маглі быць канфіскаваныя з гэтага бяспечнага сховішча і згубленыя ці іншым чынам не ўлічаныя», — заявіў міністр аховы здароўя Квінслэнду.

Санітарны ўрач Квінслэнду падкрэсліў, што рызыка для насельніцтва невысокая, паколькі дадзеныя вірусы дрэнна выжываюць па-за спецыяльных нізкатэмпературных маразільных камер і становяцца неінфекцыйнымі.

У матэрыяле Newsweek гаворыцца, што распачатае расследаванне інцыдэнту, падчас якога плануецца высветліць, як менавіта зніклі вірусы і што перашкаджала выявіць знікненне прабірак цягам амаль двух гадоў.

Прэв’ю: БелТА