Першае зімовае пахаладанне будзе імклівым

У найбліжэйшыя дні нашу краіну будзе перасякаць халодны атмасферны фронт, які адкрые шлях арктычным паветраным масам, а значыць, нас чакае першае снежаньскае пахаладанне, паведамляюць спецыялісты Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

Тэмпература паветра панізіцца, і ў начныя гадзіны пятніцы і суботы будзе вагацца ад 4 да 11 марозу. Днём слупкі тэрмометраў будуць знаходзіцца ў межах ад нуля да мінус 6 градусаў. Моцны парывісты вецер у начныя і ранішнія гадзіны будзе ўзмацняць адчуванне холаду.

На гэтым запас сур’ёзнага холаду першай паловы снежня вычарпаецца. Ужо пачынаючы з нядзелі слупкі тэрмометраў зноў накіруюцца ўверх. Прычынай пацяплення стане сістэма атмасферных франтоў, якая прынясе не толькі ападкі, але і цёплае атлантычнае паветра. Надвор’е будзе воблачным, а ападкі стануць ісці ў выглядзе снегу, мокрага снегу і дажджу, што будзе прыводзіць да галалёдных з’яў. У нядзелю на большай частцы тэрыторыі краіны тэмпература паветра ўначы — 1–8 марозу, а ўдзень — мінус 3 — плюс 2 градусы.

Паводле папярэдніх прагнозаў айчынных сіноптыкаў, у панядзелак тэмпература паветра ўначы — ад мінус 6 градусаў да 1 цяпла, удзень — мінус 1 — плюс 6 градусаў. Ветрана і вільготна будзе і ў аўторак. У гэты дзень на большай частцы тэрыторыі краіны будзе ісці дождж з мокрым снегам. Тэмпература паветра ўначы складзе ад мінус 4 на ўсходзе да плюс 4 градусаў на паўднёвым захадзе, удзень — ад нуля да плюс 7 градусаў. У сераду тэмпература паветра ўначы — ад мінус 4 градусаў да плюс 3, а ўдзень — мінус 2 — плюс 5 градусаў.

Дарэчы, сіноптыкі адзначаюць, што сёлета першая дэкада снежня аказалася на 1,9 градуса вышэйшай за кліматычную норму і склала ў сярэднім па краіне 0,2 цяпла. Пры гэтым станоўчая анамалія тэмпературы паветра адзначалася па ўсёй тэрыторыі краіны.

Сяргей КУРКАЧ