Упершыню беларуская каманда прыме ўдзел у Конкурсе прафмайстэрства работнікаў краін ШАС у Кітаі

З 16 па 20 снежня ў Пекіне і Ціндао пройдзе 3-ці Конкурс прафесійнага майстэрства работнікаў краін ШАС сярод прадстаўнікоў 26 дзяржаў.

Удзельнікаў ад Беларусі на конкурс накіроўвае Беларускі прафсаюз работнікаў галін прамысловасці «БЕЛПРАФМАШ». Гэта супрацоўнікі СЗАТ «БЕЛДЖЫ»: інжынер-электронік Дзяніс Куляшоў і інжынер-механік Ігар Сіўчык.

На працягу пяці дзён каманды будуць спаборнічаць у эксплуатацыі і наладцы прамысловых робатаў, прамысловым кіраванні інтэлектуальнай вытворчасцю, спаборніцтве слесараў-зборшчыкаў. Беларуская каманда стане ўдзельніцай першай з заяўленых дысцыплін.

— Наша каманда ўпершыню ўдзельнічае ў міжнародным конкурсе ў Кітайскай Народнай Рэспубліцы. У ходзе адбору членамі беларускай каманды сталі маладыя інжынеры цэха зваркі аднаго з вядучых і перадавых прадпрыемстваў нашай краіны, — паведаміў старшыня Беларускага прафсаюза работнікаў галін прамысловасці «БЕЛПРАФМАШ» Валерый Курсевіч. — Сёння «БЕЛДЖЫ» з’яўляецца не толькі прадпрыемствам з самымі сучаснымі тэхналагічнымі працэсамі. Але і цэнтрам кампетэнцый, дзе работнікі вучацца прама на вытворчасці. І мы не раз назіралі за іх высокім прафесіяналізмам. Упэўнены, што нашы ўдзельнікі дастойна прадставяць нашу краіну і прафсаюзны рух Беларусі.

Арганізатарам конкурсу выступае Усекітайская федэрацыя прафсаюзаў. Праходзіць ён у Кітаі штогод па розных напрамках прафесійнага майстэрства.

Варта адзначыць, што галіновы прафсаюз надае вялікую ўвагу прафесійнаму развіццю работнікаў. Яны штогод удзельнічаюць у конкурсах рэспубліканскага і міжнароднага ўзроўняў. Напрыклад, у конкурсе «Лепшы па прафесіі», у Рэспубліканскім конкурсе прафесійнага майстэрства сярод маладых работнікаў прадпрыемстваў па розных працоўных спецыяльнасцях і інш.

Алена КРАВЕЦ