Новы заказнік з’явіўся ў Брэсцкай вобласці

У Брэсцкай вобласці аб’яўлены новы заказнік «Пойма ракі Лясная». Пра гэта паведамляе БелТА са спасылкай на Нацыянальны прававы інтэрнэт-партал.

Гэта прадугледжана рашэннем Брэсцкага райвыканкама ад 13 лістапада 2024 года № 2139. Таксама зацверджана палажэнне аб новым заказніку, якім замацавана, што гэты аб’ект знаходзіцца на землях Брэсцкага раёна для захавання і рацыянальнага выкарыстання каштоўных лесабалотных экалагічных сістэм, дзікарослых раслін і дзікіх жывёл, якія адносяцца да відаў, уключаных у Чырвоную кнігу Рэспублікі Беларусь, а таксама месцаў іх росту і пасялення. Яго агульная плошча — 106,7 га.

У межах заказніка дзейнічае спецыяльны рэжым аховы і выкарыстання, які прадугледжвае шэраг забарон. Так, на гэтай тэрыторыі забаронены разведка і распрацоўка радовішчаў карысных выкапняў, скід сцёкавых вод у навакольнае асяроддзе, мыццё механічных транспартных сродкаў, правядзенне суцэльных высечак галоўнага карыстання, выпас жывёлы, сенакос у прыбярэжных палосах з 1 красавіка па 15 чэрвеня і інш.

Дакументам устаноўлена, што рэжым аховы і выкарыстання заказніка неабходна ўлічваць пры распрацоўцы і карэкціроўцы праектаў і схем землеўпарадкавання Брэсцкага раёна, праектаў меліярацыі зямель, праектаў водаахоўных зон і прыбярэжных палос паверхневых водных аб’ектаў, лесаўпарадкавальных горадабудаўнічых праектаў, праграм сацыяльна-эканамічнага развіцця Брэсцкага раёна.

Таксама дакументам устаноўлены межы, плошча і спіс землекарыстальнікаў, зямельныя ўчасткі (або іх часткі) якіх уключаюцца ў склад заказніка. Паўнамоцтвы па кіраванні маюць Брэсцкі райвыканкам.

Рашэнне ўступае ў сілу з 14 снежня.