Уладальнік ГЦ «Беларусь»: Арандатарам будуць прадастаўлены месцы ў іншых гандлёвых цэнтрах

Уладальнік ГЦ «Беларусь» Віктар Велюга расказаў журналістам аб лёсе арандатараў пасля пажару ў гандлёвым цэнтры, перадае БелТА.

«Адбылася вялікая бяда, адбылося ўзгаранне, прычыну будзе вызначаць ужо следства. Усе арандатары павінны супакоіцца, мы зробім усё неабходнае, каб людзі не засталіся без магчымасці працаваць. Камусьці будуць прадастаўлены ў бліжэйшы час месцы ў іншых гандлёвых цэнтрах», — сказаў Віктар Велюга.

Паводле яго слоў, у ГЦ будзе праводзіцца рамонт. «Пасля рамонту, зразумела, усе змогуць вярнуцца на свае працоўныя месцы, — адзначыў Віктар Велюга. — Па матэрыяльных каштоўнасцях мы нейкім чынам будзем вырашаць, каб пайсці насустрач і правесці або прадастаўленне без арэнды памяшканняў, або кампенсаваць. Але гэта трэба ўсё глядзець».

Як паведамлялася, днём 13 снежня ў МНС паступіла паведамленне аб узгаранні гандлёвага цэнтра ў Віцебску. Пасля завяршэння работы ратавальнікаў і забеспячэння мер бяспекі да работы на месцы пачала следча-аператыўная група. Для ўстанаўлення абставін інцыдэнту і прычын узгарання створана група з ліку найбольш вопытных следчых цэнтральнага апарата, следчага ўпраўлення і крыміналістычнага аддзела УСК па Віцебскай вобласці.

Распачата крымінальная справа па ч.2 арт.304 (парушэнне патрабаванняў пажарнай бяспекі, якое пацягнула па неасцярожнасці прычыненне ўрону ў буйным памеры) Крымінальнага кодэкса Беларусі. Следчыя адбіраюць неабходную дакументацыю, дапытваюць сведкаў і пацярпелых.