З 2022 года аўтамабілі, якія будуць прадавацца на тэрыторыі Еўрапейскага саюза, павінны будуць быць абсталяваныя «чорнымі скрынямі» і сістэмай аўтаматычнага ўтрымання машыны ў паласе, гаворыцца ў прэс-рэлізе Еўрапейскай камісіі.
«З 2022 года новыя тэхналогіі бяспекі стануць абавязковымі ў еўрапейскіх транспартных сродках для абароны пасажыраў, пешаходаў і веласіпедыстаў», — адзначылі ў ЕК. Новыя патрабаванні былі папярэдне ўзгоднены Еўрапарламентам, Еўрасаветам і Еўракамісіяй і змяшчаюцца ў рэгламенце павышэння ўзроўню бяспекі на дарогах.
Абавязковымі для ўсіх транспартных сродкаў стануць сістэмы фіксацыі ўважлівасці кіроўцы, утрымання машыны ў паласе, узмоцненае экстраннае тармажэнне, інтэлектуальная дапамога ў захаванні хуткаснага рэжыму, палепшаныя рамяні бяспекі, а таксама ўстанаўленне «чорнай скрыні» на выпадак аварыі. У Еўракамісіі спадзяюцца, што падобныя меры наблізяць ЕС да доўгатэрміновай мэты — нулявой смяротнасці на дарогах, і да 2038 года дазволяць пазбегнуць як мінімум 140 тысяч цяжкіх траўмаў і выратаваць больш за 25 тысяч жыццяў.
Спасылкі
[1] https://zviazda.by/be/u-svece
[2] https://zviazda.by/be/tags/eurasayuz
[3] https://zviazda.by/be/tags/autamabili