Адна з самых рэдкiх птушак нашай краiны, якая 22 гады таму стала сiмвалам грамадскай арганiзацыi «Ахова птушак Бацькаўшчыны», упрыгожыла памятныя манеты.
Цяпер нумiзматы i аматары дзiкай прыроды могуць набыць сабе цi для падарунка памятную манету «Заказнiк «Званец» з рэльефнай выявай гэтай птушкi, якая кормiць сваiх птушанят. Гэта ўжо сёмая манета з серыi «Заказнiкi Беларусi». На рэверсе манеты выяўлена рэдкая архiдэя — венерын чаравiк. Яна, як i вяртлявая чаротаўка, — адметны вiд заказнiка «Званец».
Дырэктар АПБ Аляксандр Вiнчэўскi паведамляе, што вяртлявая чаротаўка — вiд, якому пагражае глабальнае знiкненне, а ў Беларусi гэтай птушкi гняздуецца больш за 40 % яго сусветнай папуляцыi. «Вялiкае асаковае балота Званец на Брэстчыне — найважнейшае месца гнездавання гэтай чаротаўкi ў свеце. Тут на балотных выспах батанiкi знайшлi i найвялiкшыя зараснiкi рэдкiх архiдэй. Дзякуй беларускiм банкiрам, якiя дапамагаюць прыродаахоўнiкам расказваць пра выдатную беларускую прыроду. Гэта дапаможа яе захаваць», — лiчыць кiраўнiк арганiзацыi.
Сяргей КУРКАЧ
Спасылкі
[1] https://zviazda.by/be/tags/syargey-kurkach
[2] https://zviazda.by/be/ekanomika
[3] https://zviazda.by/be/finansy
[4] https://zviazda.by/be/tags/nacbank
[5] https://zviazda.by/be/tags/groshy
[6] https://zviazda.by/be/tags/ptushki