Работы па добраўпарадкаваннi двух знакавых вадаёмаў горада пачалiся вясной. За некалькi месяцаў водныя аб'екты пачысцiлi, засыпалi грунтам. Дно заслалi спецыяльнай плёнкай. Катлаван запоўнiлi вадой i нават высадзiлi водныя лiлеi.
Некалi вадаёмы былi месцам масавага адпачынку гараджан. Паабапал iх стаялi лаўкi, былi пракладзены дарожкi, дзе любiлi гуляць мамы з каляскамi i гараджане з дзецьмi. Але з цягам часу абодва штучныя аб'екты высахлi i зараслi балотнай травой. Гараджане неаднаразова звярталiся да гарадскiх улад, каб iх «ажывiць» i прывесцi ў парадак.I вось сёлетняй вясной камунальныя службы прыступiлi да рэалiзацыi праектаў. Як расказаў намеснiк генеральнага дырэктара Гродзенскай гарадской ЖКГ Сяргей Сямашка, у праект добраўпарадкавання ўнесены пэўныя змены. Так, вадаём на вулiцы Рэпiна крыху зменшыўся, а вакол яго высаджаны дрэвы i кустоўе. На вулiцы Курчатава замест дзвюх зарослых сажалак зрабiлi адзiн вялiкi аб'ект. Ёсць план абсталяваць тут спартыўна-гульнявы комплекс. Па перыметры вадаёмаў устаноўлены металiчныя агароджы, з'явiлiся альтанкi.
Самым складаным, па словах прадстаўнiка камунальнай службы, было змяненне гiдраiзаляцыйных характарыстык. Вада iшла праз дно ў глыбiню, таму фундамент вадаёма выкладваўся iзаляцыйнай плёнкай. Каб захаваць чысцiню вады, прадпрыемства «Зелянбуд» занялося высадкай раслiн, якiя садзейнiчаюць ачышчэнню вады i будуць падтрымлiваць экасiстэму ў норме. Спецыялiсты паведамiлi, што прадпрыемства закупiла пяць сартоў водных лiлей чырвонага, ружовага i белага колераў, а таксама два сарты жоўтага. Раслiны высадзiлi ў скрынкi з грунтам i камянямi i апусцiлi на дно, у хуткiм часе на паверхнi павiнны з'явiцца лiсты i распусцiцца бутоны.
Маргарыта УШКЕВІЧ
Спасылкі
[1] https://zviazda.by/be/author/margaryta-ushkevich
[2] https://zviazda.by/be/gramadstva
[3] https://zviazda.by/be/tags/grodna
[4] https://zviazda.by/be/tags/vadayomy
[5] https://zviazda.by/be/tags/dobrauparadkavanne