Колькасць працэдур дзяржаўных закупак у студзені — верасні 2020 года вырасла ў 1,9 раза ў параўнанні з аналагічным перыядам 2019-га, паведамляе [1] БЕЛТА са спасылкай на статыстыку Міністэрства антыманапольнага рэгулявання і гандлю.
«Агульная колькасць праведзеных працэдур дзяржаўных закупак за 9 месяцаў 2020 года значна вырасла ў параўнанні з паказчыкамі аналагічнага перыяду 2019-га і склала 746,8 тыс. (студзень — верасень 2019-га — 400 тыс.). Разам з тым працэнтныя суадносіны па канкурэнтных відах працэдур дзяржзакупак за 9 месяцаў 2020-га істотна знізіліся», — расказалі ў МАРГ. У прыватнасці, на 10 працэнтных пунктаў зменшылася колькасць тавараў (работ, паслуг), набытых з прымяненнем працэдуры электроннага аўкцыёну. Аналагічная сітуацыя назіраецца і з працэдурамі запытаў цэнавых прапаноў і адкрытых конкурсаў: іх стала менш на 3 працэнтныя пункты.
Па выніках працэдур дзяржзакупак у студзені — верасні заключана каля 284 тыс. дагавораў агульным коштам звыш Br4,5 млрд. Асноўную долю ў вартасным выражэнні складаюць дагаворы па закупках з адной крыніцы (9 месяцаў 2020 года — 72,7 працэнта, студзень — верасень 2019-га — 53,6 працэнта). Амаль на 17 працэнтных пунктаў зменшыўся кошт дагавораў, заключаных па выніках правядзення адкрытых конкурсаў. «Такая сітуацыя звязана з тым, што з 1 студзеня да 1 ліпеня 2019 года закупкі тавараў (работ, паслуг) пры будаўніцтве праводзіліся ў адпаведнасці з заканадаўствам аб дзяржзакупках», — растлумачылі ў МАРГ.
Прэв’ю: pravo.by
Спасылкі
[1] https://blr.belta.by/economics/view/kolkasts-pratsedur-dzjarzhzakupak-u-studzeni-verasni-vyrasla-u-19-raza-93227-2020/
[2] https://zviazda.by/be/tags/marg
[3] https://zviazda.by/be/tags/dzyarzhzakupki
[4] https://zviazda.by/be/tags/ministerstva-antymanapolnaga-regulyavannya-i-gandlyu