Адбор на другую змену ад Віцебскай вобласці для навучання ў сталічным Нацыянальным дзіцячым тэхнапарку ажыццяўляецца ў Полацкай дзяржаўнай гімназіі № 2 з ліку навучэнцаў IX-XI класаў устаноў адукацыі, паведамілі ў галоўным упраўленні па адукацыі Віцебскага аблвыканкама.

Другая змена пройдзе 1–24 сакавіка — па адукацыйных напрамках «Ваенная робататэхніка», «Пратаціпіраванне», «Зялёная хімія».

Пасля on-line рэгістрацыі конкурс праводзіцца ў тры этапы:

• ацэнка праекту, прадстаўленага патэнцыйным удзельнікам на разгляд экспертнага савета;
• тэсціраванне;
• сумоўе.

Першая адукацыйная змена ў дзіцячым тэхнапарку пройдзе з 31 студзеня па 23 лютага ў напрамках: «Зялёная хімія», «Інфармацыйныя і камп’ютарныя тэхналогіі», «Робататэхніка».

У перыяд знаходжання ў тэхнапарку будуць створаны ўмовы для асваення падлеткамі зместу адукацыйных праграм агульнай сярэдняй адукацыі на падставе індывідуальнага вучэбнага плана.

Нацыянальны дзіцячы тэхнапарк [1] створаны ў адпаведнасці з Указам Прэзідэнта (№ 145 ад 12 красавіка 2019 г.). Гэта якасна новая ўстанова адукацыі, накіраваная на выхаванне нацыянальнай інтэлектуальнай эліты. Яго галоўная мэта — рэалізацыя адукацыйных праграм, праграм дадатковай адукацыі адораных дзяцей і моладзі, накіраваных на выяўленне і развіццё ў навучэнцаў здольнасцей да навукова-даследчай работы, вынаходніцтва і рацыяналізатарства. Для адораных навучэнцаў у адным месцы будуць створаны ўмовы для вучобы, атрымання тэхнічных інавацыйных навыкаў, пражывання і спартыўна-культурнага адпачынку.

 Аляксандр ПУКШАНСКІ

Прэв’ю: kudapostupat.by