Сабекошт вакцыны «Спадарожнік V» арыентыровачна Br52, распавёў намеснік міністра аховы здароўя — галоўны дзяржаўны санітарны ўрач Аляксандр Тарасенка у эфіры тэлеканала СТВ, паведамляе [1] БелТА.
«Арыенціровачна Br52. Гэта два кампанента, — сказаў Аляксандр Тарасенка, адказваючы на пытанне пра сабекошт вакцыны. — Ці можам памнажаць на 5,5 млн насельніцтва, якое плануем прышчапіць да канца года, і атрымаецца ўся сума. Гэта толькі сабекошт вакцыны, не ўключаючы расходныя матэрыялы».
На стадыі, калі вырашалася пытанне з закупкай вакцын, Міністэрствам аховы здароўя вывучалася эфектыўнасць розных варыянтаў, іх ужыванне ў іншых краінах, рэгістрацыя. Адным з крытэрыяў, па якіх выбіралася вакцына, быў яе кошт. «Вакцына Pfizer першапачаткова прапаноўвалася па кошту каля $80. Я думаю, не кожны б аддаў такую суму за вакцыну, а для дзяржавы гэта былі б пэўныя выдаткі», — сказаў Аляксандр Тарасенка.
Міністэрства аховы здароўя ставіць задачу вакцынаваць не менш за 60% насельніцтва рэспублікі да канца года. Нацыянальны план вакцынацыі на 2021-2022 гады прадугледжвае чатыры этапы. «Мы знаходзімся на першым і другім этапах, а ўсяго іх чатыры. Прыярытэт на сёння аддадзены работнікам аховы здароўя, адукацыі, сацыяльнай абароны і асобам старэйшыя за 60 гадоў. Трэці этап — гэта работнікі транспарту, гандлю, грамадскага харчавання, бытавога абслугоўвання, якія па родзе сваёй дзейнасці могуць мець кантакты з інфіцыраванымі. Чацвёрты — усе жадаючыя», — адзначыў галоўны дзяржаўны санітарны ўрач.
Ён дадаў: у перспектыве з вялікай доляй верагоднасці вакцынацыя супраць каранавіруснай інфекцыі будзе ўключана ў нацыянальны каляндар прышчэпак.
Што тычыцца працягласці дзеяння прышчэпак супраць COVID-19, гэта пытанне яшчэ даследуецца. «З прычыны таго што недастаткова вывучана працягласць поствакцынальнага імунітэту, мы лічым, што будзе дзейнічаць да года. Матэматычныя разлікі, якія праводзяць вытворцы, паказваюць нават і два гады. Карэкціроўка па вакцынацыі насельніцтва ў рэспубліцы будзе праводзіцца з улікам дадзеных поствакцынальнага імунітэту», — дадаў Аляксандр Тарасенка.
Прэв’ю: pixabay.com
Спасылкі
[1] https://www.belta.by/society/view/tarasenko-rasskazal-skolko-sredstv-budet-zatracheno-na-vaktsinatsiju-belorusov-sputnikom-v-441732-2021/
[2] https://zviazda.by/be/tags/vakcyna
[3] https://zviazda.by/be/tags/sabekosht
[4] https://zviazda.by/be/tags/karanavirus
[5] https://zviazda.by/be/tags/alyaksandr-tarasenka-0