Адна з першых тэматычных анлайн-пляцовак маштабнага сеткавага семінара, які праводзяць Кітайскі камітэт ШАС па добрасуседстве, сяброўстве і супрацоўніцтве сумесна з парталам «Хуаньцюван», была прысвечана абмеркаванню тэмы «Рэвалюцыя новых СМІ з пазіцыі медыяменэджараў».
Галоўным спікерам на ёй выступіў галоўны рэдактар «Хуаньцюван» Шы Дзін. Гэты інтэрнэт-партал — адзін з самых наведвальных у Паднябеснай. Яго штодзённая аўдыторыя дасягае больш чым 100 мільёнаў чалавек. Пачынаўся гэты маштабны праект з адпаведнага аддзела ўплывовай кітайскай газеты «Хуаньцю шыбаа», якая галоўным чанам распрацоўвае міжнародную тэматыку.
Адпаведнае тэматычнае поле і ў huanqiu.com. Як заўважыў Шы Дзін, «мы з'яўляемся адным з галоўных пастаўшчыкоў міжнародных навін». Гэтае сеткавае выданне сярод найбольш аўтарытэтных у Паднябеснай. «Хуаньцюван» аператыўна рэагуе на выклікі часу, у прыватнасці, у плане візуалізацыі кантэнту, працы на розных платформах, сацыяльных сетках.
Партал актыўна перафарматаваўся на прыярытэтную падачу відэанавін, прымяняе дроны, тэхніку віртуальнай рэальнасці. Адметна, што важнае месца ў навінавай стужцы «Хуаньцюван», як паведаміў карэспандэнту «Звязды» галоўны рэдактар партала, займаюць паведамленні з Беларусі. «Мы аператыўна рэагуем на важныя падзеі ў вашай краіне», — заўважыў Шы Дзін.
Мікалай ЛІТВІНАЎ
Спасылкі
[1] https://zviazda.by/be/author/mikalay-litvinau
[2] https://zviazda.by/be/u-svece
[3] https://zviazda.by/be/vestki-z-kitaya-0
[4] https://zviazda.by/be/vestki-z-kitaya