Старшыня Савета Рэспублiкi прыняла ўдзел ва ўрачыстай цырымоніі адкрыцця кругласутачнага ваенна-патрыятычнага лагера на базе вайсковай часці 3214 унутраных войскаў МУС. Разам са спікерам верхняй палаты парламента сюды прыехалі таксама і кіраўнікі міністэрстваў і ведамстваў краіны, дэпутаты Палаты прадстаўнікоў, старшыня Мінгарвыканкама і іншыя зацікаўленыя асобы. У пэўным сэнсе гэтая рабочая паездка нагадвала, асабліва яе другая частка, выязное пашыранае пасяджэнне Прэзідыума Савета Рэспублікі на тэму пошуку шляхоў удасканалення ваенна-патрыятычнага выхавання падлеткаў і моладзі.
Так, спачатку гасцям у святочнай атмасферы свае майстэрства і таленты на плацу прадэманстравалі ваенаслужачыя і ўдзельнікі лагера, чым выклікалі хвалю цёплых эмоцый і слоў у гледачоў. У прыватнасці, Наталля Качанава павіншавала віноўнікаў урачыстасці з адкрыццём новай змены, пажадала ім усяго самага добрага, таксама любіць нашу выдатную Беларусь бязмерна і каб у будучыні гонар, сумленне, справядлівасць былі асновамі іх жыцця.
Старшыня Савета Рэспублікі таксама выказала словы ўдзячнасці бацькам, якія адправілі сваіх дзяцей у гэты летнік, паколькі вельмі важна — выхоўваць патрыётаў, грамадзян сваёй краіны. Бо моладзь з’яўляецца прадаўжальнікам традыцый, якія гадамі фармаваліся ў нашай незалежнай Беларусі. А для нас моладзь — гэта будучыня нашай краіны, таму маладзёжная палітыка з’яўляецца адной з прыярытэтных напрамкаў дзяржаўнай палітыкі.
— Я дзякую афіцэрам унутраных войскаў за тое, што яны працуюць з хлопцамі, выконваючы пры гэтым асноўныя функцыі па ахове парадку, міру і спакою ў нашай краіне. Гэтыя хлопцы, якія прыйдуць вам на змену, будуць дапамагаць вам у гэтай працы, — падкрэсліла Наталля Качанава.
Другой не менш важнай часткай знаходжання дэлегацыі высокіх гасцей стаў круглы стол на тэму «Грамадзянска-патрыятычнае выхаванне як важны рэсурс стабільнага развіцця дзяржавы». Падчас шчырай і прадметнай размовы спікер выказала ўдзячнасць Міністэрству ўнутраных спраў за арганізацыю ваенна-патрыятычных лагераў і запрасіла да дыскусіі ўдзельнікаў. Дарэчы, Наталля Качанава таксама выказала шэраг слушных прапаноў, у прыватнасці, распачынаць работу па грамадзянска-патрыятычным выхаванні ўжо з дашкольнага ўзросту. На яе думку, ваенна-патрыятычным лагерам абавязкова быць! «Нельга забываць аб подзвігу пакаленняў, якія адстаялі мір, свабоду і незалежнасць, тых, хто аднавіў з руін нашу краіну. і сёння вы, моладзь, павінны захаваць мір і спакой на нашай зямлі», заўважыла старшыня Савета Рэспублікі.
Гутарылі аб розным і самым надзённым для арганізацыі паўнацэннага функцыянавання ваенна-патрыятычных лагераў не толькі у Мінску. Міністр аховы здароўя Дзмітрый Піневіч засяродзіўся, зразумела, на пытаннях медыцынскага суправаджэння дзяцей у лагерах, якаснага, але пажадана, згодна салдацкіх нормаў, харчавання.
Старшыня Мінгарвыканкама Уладзімір Кухараў параіў больш уважліва прыглядзецца да досведу ваенна-патрыятычнага выхавання падлеткаў і моладзі часоў Савецкага Саюза. Гэтыя былыя напрацоўкі можна і трэба творча пераасэнсаваць і актыўней выкарыстоўваць, зразумела, з папраўкай на сённяшні час.
Намеснік міністра адукацыі Аляксандр Кадлубай засяродзіўся на практыцы арганізацыі ваенна-патрыятычных класаў у школах.
Потым у размове з журналістамі спікер адзначыла, што з новага навучальнага года ў беларускіх школах ўводзіцца пасада кіраўніка ваенна-патрыятычнага выхавання.
— Гэта абсалютна правільнае рашэнне. Тым больш мы бачым, што ў школах у нас мала мужчын-выкладчыкаў. А выхоўваць маладога чалавека павінны як жанчыны, так і мужчыны, — пераканана Наталля Качанава.
Мікалай ЛЮБЧАНСКІ
Фота БелТА
Спасылкі
[1] https://zviazda.by/be/gramadstva
[2] https://zviazda.by/be/silavyya-struktury
[3] https://zviazda.by/be/tags/natallya-kachanava
[4] https://zviazda.by/be/tags/mus
[5] https://zviazda.by/be/tags/vayskovaya-chasc-3214