Калі на выдатныя тэатральныя пастаноўкі за мяжу немагчыма з'ездзіць, то на іх можна схадзіць у Мінску. Аматары праекта TheatreHD ужо даўно ацанілі яго выгоды, асабліва ў «мёртвы сезон». Як і тыя, хто любіць музычны тэатр, аматары драматычных спектакляў будуць усцешаныя ў жніўні. І не толькі яны...

Пакажуць драмы і акрамя тых, што мы згадвалі раней, — «Доктара Фаўста» ў шэкспіраўскім «Глобусе» і «Франкенштэйна» ў пастаноўцы Дэні Бойла з Бенедзіктам Камербэтчам ды Джоні Лі Мілерам. Але ўсё ж не забыцца б 18 жніўня завітаць у «Falcon Club Буцік Кіно»: «Франкенштэйн: Лі Мілер». Гэтым разам ёсць магчымасць ацаніць работу другога выдатнага акцёра, які выступіў у ролі штучна створанай істоты. Праўда, усё больш цікава, таму што насамрэч два брытанскія акцёры мяняюцца ролямі, нездарма яны падзялілі дзве галоўныя лонданскія тэатральныя ўзнагароды — прэмію Лоўрэнса Аліўе і прэмію газеты Evenіng Standard...

Сустрэчы з брытанскімі акцёрамі працягне паказ камернага сектакля «Верхняе святло» ў кінатэатры «Цэнтральны» 10 жніўня. Кэры Маліган і Біл Наі ўвасобілі людей, некалі вельмі блізкіх, але жыццё развяло іх па розныя бакі: хтосьці здолеў здабыць поспех, а хтосьці звычайны служачы без асаблівых надзей. Хто не паспее на найбліжэйшым тыдні, той няхай не спазняецца 18 жніўня: паўтор у VOKA Cіnema Sіlver Screen. Але раней — 11 жніўня — тут адбудзецца паказ камедыі «Сірано дэ Бержерак» з Джэймсам Макэваем.

Ну, і зноў вечны Шэкспір: «Globe: Венецыянскі купец», класіка, якая заўсёды актуальная. У ХХІ стагоддзі здаецца, што толькі наш час поўны складанымі сацыяльнымі канфліктамі і ментальнымі сутыкненнямі. Але такія якасці як талерантнасць, адкрытасць і міласэрнасць выпрацоўваліся стагоддзямі (15 жніўня у «Falcon Club Буцік Кіно» і паўтор 25 жніўня ў VOKA Cіnema Sіlver Screen). І пра агульначалавечыя каштоўнасці разважалі яшчэ з часоў Шэкспіра. А ў нас 22 жніўня ў «Falcon Club Буцік Кіно» будзе магчымасць паназіраць не проста за трагедыяй чалавека, якому належыць улада, а яшчэ і за гульнёй Іэна Макелена.

І «разыначка» праекта TheatreHD з англійскім акцэнтам: спектакль-лаўрэат сямі прэмій Лоўрэнса Аліўе і прэміі «Тоні» за найлепшую п'есу «Загадкавае начное забойства сабакі». Не столькі дэтэктыў, колькі паглыбленне ў свет чалавека з аўтызмам (апошні дзень лета, кінатэатр «Цэнтральны»).

Але ёсць тое, што для нас больш блізкае і хвалюючае. Тэатралы чакаюць «Бесаў» Дастаеўскага ў пастаноўцы Канстанціна Багамолава. Насамрэч варта напісаць «у інтэрпрытацыі», бо гэты рэжысер вылучаецца аўтарскім прачытаннем, у чым можна пераканацца ўжо 11 жніўня ў «Falcon Club Буцік Кіно».

Працягам тэмы імкнення чалавека да ўнутранай гармоніі, пра што шмат разважаў Дастаеўскі, сёлета стане асобная частка паказаў, арганізаваных Цэнтрам «АРТ Карпарэйшн», прысвечаная жывапісу. Ужо 8 жніўня ў «Falcon Club Буцік Кіно» будзе дэманстравацца дакументальны фільм «Дэга: Запал да дасканаласці». 14 жніўня фільм-выстаўка «Сады ў жывапісе — ад Манэ да Маціса» (VOKA Cіnema Sіlver Screen). Будзе магчымасць пазнаёміцца з яшчэ адным імпрэсіяністам, праўда, крыху пазней — 28 жніўня ў VOKA Cіnema Sіlver Screen «Сезан. Партрэты жыцця».

Але і для мастацкай класікі будзе час. 15 жніўня ў «Цэнтральным» — фільм «Каналета і мастацтва Венецыі», прысвечаны італьянскаму майстру эпохі класіцызму. І вялікі майстар Адраджэння ў кінатэатры «Цэнтральны»: дакументальны фільм-выстаўка «Загадкі Рафаэля» — па-сутнасці, гэта знаёмства з рымскай экспазіцыяй работ мастака (29 жніўня). Як такое яшчэ ўбачыць, асабліва цяпер?

Ларыса ЦІМОШЫК