«Перш за ўсё хачу адзначыць, што беларускія чэкісты ўнеслі важкі ўнёсак у абарону нашай краіны і людзей ад маштабных знешніх і ўнутраных пагроз. Пра гэта я ўжо казаў падчас узнагароджання вашых калег высокімі дзяржаўнымі ўзнагародамі», – падкрэсліў кіраўнік дзяржавы. Ён звярнуў увагу, што сітуацыя ў краіне застаецца напружанай і супакойвацца не дае. Па словах Прэзідэнта, няўдалая спроба дзяржаўнага перавароту не змяніла планаў праціўнікаў. Калектыўны захад працягвае ўмешвацца ва ўнутраныя справы краіны, нацэльваючыся на змену ўлады і самае небяспечнае – знішчэнне незалежнасці дзяржавы.
«Гэта мы павінны памятаць, разумець і адчуваць кожны дзень і кожную гадзіну, асабліва вы. Задзейнічаюцца санкцыі, фінансуюцца пратэсты, экстрэмізм, тэрарызм, падбіраюцца і рыхтуюцца баевікі. Мы гэта не проста ведаем, мы з гэтым працуем.
Створаная пад кантролем спецслужбаў палітэмігранцкія цэнтры ў Варшаве і Вільні нацэльваюць радыкалаў на акцыі застрашвання ў дачыненні да грамадскіх і дзяржаўных дзеячаў, прадстаўнікоў сродкаў масавай інфармацыі, сілавых органаў, дабраліся і да судзейскага корпуса. Дыверсіі плануюцца на аб'ектах абароннага комплексу, эканомікі, жыццезабеспячэння. Замежныя спецслужбы і іх памагатыя вывучаюць абстаноўку ў працоўных калектывах, спрабуюць інспіраваць забастоўкі», – адзначыў Аляксандр Лукашэнка. Адной з магчымых дат чарговай спробы рэвалюцыі, дня Х, паводле яго слоў, разглядаецца перыяд правядзення Канстытуцыйнага рэферэндуму.
Кіраўнік дзяржавы звярнуў увагу, што выкарыстоўваюцца апрабаваныя ў іншых краінах сучасныя інфармацыйныя тэхналогіі, разгорнута псіхалагічная вайна, нацэленая на фарміраванне ў насельніцтва Беларусі негатыўнага вобразу ўлады. Гэтыя методыкі ўздзеяння накіраваны на супрацоўнікаў дзяржапарату і сілавікоў з мэтай пераканаць іх у адсутнасці падтрымкі з боку насельніцтва, у якога зарадзілася сумневы ў правільнасці дзяржаўнага палітычнага курсу.
Адной з ключавых гібрыдных пагроз беларускі лідар назваў складаную абстаноўку на дзяржаўнай мяжы.
«Польшча і Літва абвінавачваюць Беларусь у нібыта штучным стварэнні міграцыйнага крызісу, пры гэтым праводзяць спецаперацыі па стварэнні каналаў выбыцця мігрантаў з месцаў утрымання на тэрыторыю Германіі і Францыі, масава цынічна парушаючы правы чалавека. Я гэта кажу для таго, каб немцы нарэшце прачнулася з французамі, ды і англічанамі і іншымі краінамі і паглядзелі, што адбываецца з гэтымі мігрантамі ў Польшчы і Літве. Яны дэманструюць ўсюды, што яны нібыта ўтрымліваюць іх у пэўных месцах, у лагерах. А на самай справе, гэта толькі перасыльныя пункты, яны спецыяльна выпускаюць з лагераў гэтых людзей, разумеючы што яны прыйшлі не ў Польшчу і Літву, сапраўды гэтак жа як і ў Беларусь. Яны ідуць далей – у Германію, у больш цёплыя краіны. Палякі і літоўцы гэта разумеюць і паволі выпускаюць іх з лагераў. І немцы ўжо тысячамі іх затрымліваюць у сябе на тэрыторыі. Мы валодаем гэтымі данымі. Мы пераправяралі гэта праз некалькі крыніц і гэта сапраўды так. Дык вось, няхай яны там у сябе разбяруцца, хто немцам і французам падкідвае мігрантаў. Па нашых даных, там гінуць людзі і колькасць загінулых у разы перавышае публічныя заявы польскіх і літоўскіх палітыкаў. Нягледзячы на хвалёную еўрапейскую свабоду слова, да інфармацыі аб рэальнай абстаноўцы СМІ з іх боку не дапускаюцца», – расказаў Аляксандр Лукашэнка.
Паводле яго слоў, у гэтых умовах на супрацоўнікаў камітэту дзяржбяспекі ўскладаецца задача па забеспячэнні стабільнага сацыяльна-палітычнага становішча, абароны краіны ад дэструктыўнага ўздзеяння.
Першачарговымі задачамі для супрацоўнікаў КДБ кіраўнік дзяржавы назваў нарошчванне намаганняў па барацьбе з тэрарызмам і экстрэмізмам, процідзеянне антыканстытуцыйным праявам. «Прынцыповае значэнне мае кантроль абстаноўкі ў працоўных калектывах прадпрыемстваў, органаў улады, для гэтага мы стварылі адпаведныя інстытуты. Сур'ёзным рэзервам у дзейнасці камітэта з'яўляецца павышэнне эфектыўнасці знешняй разведкі, яе неабходна трансфармаваць у падраздзяленне здольнае вырашаць стратэгічныя задачы, узмацняць наступальнасць, нарошчваць патэнцыял агентурнай разведкі і іншыя метады і формы», – канстатаваў ён.
Прыярытэтнай задачай застаецца выяўленне і спыненне памкненняў замежных спецслужбаў да выкрыцця службовай інфармацыі дзяржаўных органаў і прадпрыемстваў. «Жыццёва важна не адставаць ад нашых праціўнікаў і пашыраць выкарыстанне сучасных тэхналогій у аператыўнай дзейнасці, павышаць эфектыўнасць тэхнічнага блока КДБ, радыёэлектроннай разведкі, развіваць навуковы патэнцыял», – упэўнены Прэзідэнт.
Беларускі лідар звярнуў увагу на неабходнасць істотна нарасціць намаганні па абароне інфармацыйнай прасторы, укараняць новыя, у тым ліку тэхнічныя метады проціборства, садзейнічаць наступальнай інфармацыйнай палітыцы СМІ.
«Звяртаю ўвагу на работу з кадрамі, галоўным крытэрыем для супрацоўніка КДБ з'яўляецца патрыятызм, недапушчэнне любых праяў карупцыі, а асабліва здрады. У ведамстве павінны служыць толькі лепшыя прадстаўнікі грамадства, кіруючыся выключна інтарэсамі нашай дзяржавы», – падкрэсліў Прэзідэнт.
Аляксандр Лукашэнка прывёў цытату знакамітага Фелікса Дзяржынскага, які стаяў ля вытокаў стварэння спецслужбаў, які казаў: «чэкістам можа быць толькі чалавек з гарачым сэрцам, халоднай галавой і чыстымі рукамі».
«Хачу яшчэ раз падкрэсліць, нягледзячы на стабілізацыю сітуацыі ў Беларусі, нам супакойвацца рана. Упэўнены, што пастаўленыя задачы вам па сілах і прызначаныя сёння кіраўнікі гэта дакажуць. Вы ведаеце, што гэта не толькі прызначэнне, але і ратацыя кадраў. Як гэта прынята не толькі ў сілавых ведамствах, але і ў дзяржаўных структурах, некаторыя асобы перасоўваюцца па гарызанталі. І гэта нармальная практыка, я яе прытрымліваюся ў сваёй працы і так будзе і надалей», – заявіў кіраўнік дзяржавы.
У кадравы панядзелак Прэзідэнт прызначыў новага міністра юстыцыі. Цяпер кіраваць ведамствам будзе Сяргей Хаменка, які дагэтуль займаў пасаду намесніка міністра ўнутраных спраў.
«Публічна хачу сказаць, Сяргей Мікалаевіч, што права на памылку ў вас няма ў сілу пільнай увагі да таго пытання, якім вы будзеце займацца. У нейкай ступені гэта крок неардынарны — гэта для тых, хто не пагружаны ў гэтую тэму. З пункту гледжання паглыбленасці ў праблему гэта цалкам нармальна, — заявіў Аляксандр Лукашэнка. Ён растлумачыў, што мае на ўвазе. — Добрыя, моцныя юрысты ў Мінюсце ёсць. Там у бліжэйшы час патрэбныя будуць вельмі моцныя арганізатары, кіраўнікі, таму што прыйдзецца вырашаць вельмі шмат арганізацыйных пытанняў».
Прэзідэнт нагадаў, што па лініі Мінюста плануецца правядзенне шэрагу мерапрыемстваў, перш за ўсё арганізацыйнага характару:
«Не стану хаваць: там патрэбныя вельмі адданыя людзі, дысцыплінаваныя, нацэленыя на вырашэнне пытанняў. Там нельга сёння лічыць да 20, 10 або нават да трох. Там трэба прымаць рашэнні або рэалізоўваць прынятыя рашэнні. Людзі гэта ўбачаць у бліжэйшы час», — растлумачыў кіраўнік дзяржавы.
Прэзідэнт прызнаўся, што ў Сяргеі Хаменка ўбачыў вялікі патэнцыял і падкрэсліў, што нельга было страціць такога адукаванага і здольнага чалавека, патрыёта краіны.
«Гэта было маё асабістае меркаванне, і я папярэдзіў усіх начальнікаў, у тым ліку міністра ўнутраных спраў (думаю, ён з вамі перагаварыў), каб вас пераканаць, што трэба ўзяць на сябе гэтую ношу і даказаць людзям, што вы сапраўдны кіраўнік», — адзначыў Аляксандр Лукашэнка.
Прэзідэнт звярнуў увагу: нягледзячы на тое, што Сяргей Хаменка не працаваў у сістэме Міністэрства юстыцыі, у яго дастаткова вопыту для таго, каб узначаліць ведамства, бо ён служыў у праваахоўных органах. У Мінюст патрэбны перш за ўсё магутны кіраўнік і арганізатар, падкрэсліў Аляксандр Лукашэнка. «Я вельмі на вас спадзяюся. Таму ў пачатку і сказаў, што права на памылку ў вас няма. Гэта маё асабістае рашэнне. Я „прымерваў“ вас да розных пасадаў, але зразумеў, што тут вы, напэўна, нам і краіне прынесяце больш карысці, чым на нейкіх іншых пасадах», — рэзюмаваў Прэзідэнт.
Адразу пасля прызначэння Сяргей Хаменка падзяліўся з журналістамі сваімі планамі:
«Міністэрства юстыцыі — гэта адно з ключавых міністэрстваў, якое вызначае дзейнасць у праваахоўнай галіне. І сёння абстаноўка патрабуе аператыўнага вырашэння ўсіх пытанняў, не толькі тых, якія датычацца эканомікі, сацыяльнай сферы, але і сферы юстыцыі. Яна настолькі шматгранная і шырокая і тут кіраўніком дзяржавы даручана ўдасканаленне кіраўніцкай дзейнасці», — расказаў ён.
Паводле слоў міністра, сваю ролю ён бачыць у наданні асобе, грамадству і дзяржаве надзейнай платформы ў галіне юрыспрудэнцыі.
«Як чалавек, які мае вопыт у кіраванні вялікімі калектывамі, прысвяціў жыццё слову „законнасць“, зыходзячы з таго даверу, які аказаў кіраўнік дзяржавы, мяркую, што з калектывам Міністэрства юстыцыі мы выканаем ўсе пастаўленыя задачы», — падкрэсліў Сяргей Хаменка.
Валерыя СЦЯЦКО
Фота БелТА
Спасылкі
[1] https://zviazda.by/be/author/valeryya-scyacko
[2] https://zviazda.by/be/palityka
[3] https://zviazda.by/be/prezident
[4] https://zviazda.by/be/tags/aliaksandr-luka%C5%A1enka
[5] https://zviazda.by/be/tags/kdb
[6] https://zviazda.by/be/tags/kadravyya-naznachenni