Белы будынак пад карычневым дахам з залатой цыбулінкай і крыжам наверсе — храм у гонар Свяціцеля Мікалая Цудатворца ў вёскі Віркаў Клічаўскага раёна адзначыў сваё другое нараджэнне. У суботу епіскап Бабруйскі і Быхаўскі Серафім асвяціў яго і адслужыў святочную Літургію.
Былую царкву разбурылі яшчэ ў шасцідзясятых гадах. Намаганням праваслаўнай суполкі на тым самым месцы пабудавалі дом і зрабілі ў ім храм. Летась, дзякуючы актыўным прыхаджанам і прадпрымальніку Генадзю Сабалеўскаму, ён быў цалкам акультураны. Унутры — сучаснае пакрыццё пад дрэва, багаты іканастас, кованыя элементы ўпрыгожвання — ва ўсім адчуваецца густ і функцыянальнасць. Звонку храм не менш прывабны. Беларускі мастак Віктар Барабанцаў упрыгожыў яго фасад мазаікай з абліччамі Святых. На тэрыторыі храма пакладзена плітка, зроблена невялікая званіца, наведзены ўзорны парадак. Епіскап высока ацаніў і сам храм, і яго аздабленне, заўважыў, што ён упрыгожыў бы нават горад. Раённае кіраўніцтва лічыць адкрыццё храма добрым знакам.
— Гэта вельмі цудоўна, бо з вяртаннем храмаў ідзе і духоўнае адраджэнне народа, — адзначыў начальнік аддзела па адукацыі, спорту і турызму Клічаўскага райвыканкама Аляксандр Мялешка. — Там вучаць дабрыні, спагадзе, павазе адно да аднаго. Спадзяюся, што з гэтым храмам у нас стане менш небяспечных сем’яў. Наогул я заўсёды спадзяюся, што ўслед за адраджэннем храмаў, пачнуцца адраджацца і школы. На жаль, у Віркава сёння няма ні школы, ні дзіцячага садка. Віракаўскіх дзяцей падвозім у Перакольскую сярэднюю школу. Там створаны ўсе ўмовы для іх навучання. Сёлета быў зроблены капітальны рамонт па дзяржпраграме за конт сродкаў Сусветнага банка. Але, калі колькасць дзяцей ў Віркаве пачне расці, не выключна, што тамтэйшая школа зноў вернецца да жыцця.
У тым, што храм запрацаваў, вялікая заслуга ўраджэнца вёскі Віркаў бізнесмена Генадзя Сабалеўскага. Ён, дарэчы, перыядычна аказвае дапамогу сацыяльна-педагагічнаму цэнтру, дзіцячаму прытулку. За яго конт мяняліся вокны, набывалася мэбля і бытавая тэхніка. Ён дапамагае збіраць сацыяльна неабароненых дзяцей у школу, набывае для іх цёплае адзенне, цацкі. Ён вельмі трапяткі адносіцца да памяці герояў Вялікай Айчыннай вайны. У Віркаве ён спансіраваў аднаўленне помніка загінулым аднасяльчанам, паклапаціўся пра добраўпарадкаванне тэрыторыі. Зараз вось дапамог аднавіць храм у гонар Свяціцеля Мікалая.
Для настаяцеля храма іерэя Максіма гэта трэці прыход на тэрыторыі Клічаўскага раёна, які ён будзе апякаць. Ён адзначае, што з адкрыццём храмаў становіцца ўсё больш веруючых. І гэта не можа не радаваць, бо веруючы чалавек ніколі не будзе спавядаць нянавісць, зло і здраду. Айцец Максім паведаміў таксама, што ў хуткім часе ў віракаўскі Свята-Мікольскі храм прывязуць памятную дошку з часткай каменя з турэцкага храма горада Дземрэ, старадаўняй Міры Лікійскай, дзе быў пахаваны святы падзвіжнік.
Нэлі ЗІГУЛЯ
Фота з сайта Бабруйскай епархіі
Спасылкі
[1] https://zviazda.by/be/tags/hram-u-gonar-svyacicelya-mikalaya-cudatvorca
[2] https://zviazda.by/be/tags/vyoska-virkau
[3] https://zviazda.by/be/tags/klichauski-rayon-0