Абласная дабрачынная акцыя «Цуды на Каляды» стартуе сёння ў Магілёве. Яна дапаможа выканаць навагоднія жаданні больш як 50 маленькіх жыхароў рэгіёну, паведаміла [1] БелТА галоўны спецыяліст абкама БРСМ Анжаліка Яўных.
«Штогод візітнай карткай акцыі становіцца „ёлка жаданняў“, упрыгожаная паштоўкамі з навагоднімі пажаданнямі дзяцей, — расказала Анжаліка Яўных. — Такое чароўнае навагодняе дрэва размесціцца ў магілёўскім універмагу „Цэнтральны“. Пад ёлкай будзе ўстаноўлена каробка „Добрых сэрцаў“, пакласці падарунак і тым самым увасобіць у жыццё жаданне дзіцяці. Для шчасця маленькага чалавека неабходна зусім няшмат — ад мяккай цацкі да развіваючай гульні».
Акрамя таго, падчас правядзення гэтай акцыі валанцёры руху «Добрае сэрца» дапамогуць выканаць навагоднія жаданні навучэнцаў з цэнтраў карэкцыйна-развіваючага навучання і рэабілітацыі Глуска, Бабруйскага і Асіповіцкага раёнаў. Частка сабраных падарункаў будзе перададзена шматдзетнай сям’і Ціханавых са Слаўгарада і дому сямейнага тыпу сям’і Рак Бабруйскага раёна.
Абласная дабрачынная акцыя будзе праходзіць з 6 па 30 снежня ў будныя дні. Прыняць у ёй удзел і пакінуць падарунак дзецям можна з 15.00 да 18.00. Менавіта ў гэты перыяд валанцёрскія атрады БРСМ арганізуюць збор навагодніх падарункаў, цацак, гульняў, якія развіваюць, канцылярскіх прылад і спартыўных тавараў. Традыцыйна напярэдадні свят гэтыя падарункі перададуць дзецям-сіротам, шматдзетным сем’ям, дзецям, якія апынуліся ў цяжкай жыццёвай сітуацыі і дзіцячым-дамам сямейнага тыпу.
Прэв’ю: pexels.com
Спасылкі
[1] https://www.belta.by/regions/view/oblastnaja-blagotvoritelnaja-aktsija-chudesa-na-rozhdestvo-startuet-v-mogileve-473258-2021/
[2] https://zviazda.by/be/tags/cudy-na-kalyady-0
[3] https://zviazda.by/be/tags/magilyou
[4] https://zviazda.by/be/tags/ruh-dobrae-serca