Дачакаўшыся першых цёплых дзён, многія з нас не толькі дасталі з шафы вясеннюю вопратку, а і паспяшаліся выцягнуць з лоджый, падвалаў і гаражоў веласіпеды. Аднак, падрыхтаваўшы іх да сезона і нават ужо прымяніўшы па прызначэнні, некаторыя веласіпедысты забыліся пра адну вельмі важную дэталь — паклапаціцца аб захаванасці свайго транспартнага сродку.
З наступленнем вясны ўсё часцей у органы ўнутраных спраў трапляюць паведамленні аб крадзяжах веласіпедаў. Сёлета гарачая пара для велазлодзеяў наступіла раней, чым звычайна. Па стане на 2 сакавіка ўжо здзейснена 159 такіх злачынстваў (летась за аналагічны перыяд — 143). Усяго за 2021 год праваахоўнікі зафіксавалі 2128 фактаў крадзяжу велатранспарту. Большасць правапарушэнняў, як правіла, звязаная з бесклапотнымі адносінамі ўладальнікаў да захаванасці сваёй маёмасці.
— Ці магчыма ўявіць, каб хтосьці пакінуў у пад'ездзе або на вуліцы нейкую рэч коштам у сотні рублёў? — задае рытарычнае пытанне начальнік арганізацыйна-аналітычнага ўпраўлення міліцыі грамадскай бяспекі МУС, палкоўнік міліцыі Вадзім Петыш. — А з веласіпедамі, якія часам каштуюць значна даражэй, такое адбываецца дастаткова часта. Прычым, як паказвае практыка, некаторыя велааматары лічаць дастатковым проста паставіць веласіпед пад акном свайго дома. Калі б уладальнікі не адносіліся так абыякава да свайго двухколавага транспарту, крадзяжоў было б у разы менш. Наяўнасць нават самага простага тросу або ахоўнага прыстасавання павялічвае шанцы на тое, што злодзей пройдзе міма.
Праваахоўнікі не перастаюць паўтараць: захаванасць маёмасці залежыць выключна ад саміх грамадзян. Пакідаючы веласіпед у грамадскім месцы нават на непрацяглы час, варта прывязваць яго тросікам з велазамком. Спецыялісты рэкамендуюць выкарыстоўваць трос максімальнай таўшчыні. Веласіпед неабходна замацоўваць за кола і раму. Калі ж даўжыня троса дазваляе, то за раму і за абодва колы.
Пакідаючы веласіпед у лёгкадаступных для іншых грамадзян месцах, ёсць сэнс забіраць з сабой аксесуары, якія хутка здымаюцца: велакамп'ютар, ліхтар, помпу, іншыя гаджэты. Такі транспартны сродак не складае асаблівай цікавасці для хуліганаў. Найбольшая ж захаванасць забяспечваецца тады, калі ён знаходзіцца ў полі зроку гаспадароў або пад назіраннем відэакамер.
На жаль, як паказвае статыстыка, прадаць украдзены веласіпед даволі лёгка. Дастаткова і тых, хто гатовы купляць крадзенае. Хоць зразумець, што яно менавіта такое, нескладана: у большасці выпадкаў за яго просяць невялікія грошы, у той час як рэальны кошт транспартнага сродку нашмат большы.
Як нагадвае Вадзім Петыш, набываючы крадзенае, людзі рызыкуюць застацца і без гэтай рэчы, і без кампенсацыі за яе. «Акрамя таго, грамадзяне могуць быць прыцягнутыя да крымінальнай адказнасці па артыкуле 236 Крымінальнага кодэкса — набыццё або збыт матэрыяльных каштоўнасцяў, загадзя здабытых злачынным шляхам, — удакладніў прадстаўнік міліцэйскага ведамства. — Адказнасць за дадзенае злачынства дастаткова суровая: да шасці гадоў пазбаўлення волі са штрафам».
Калі ж усё-ткі ваш веласіпед укралі, неадкладна паведаміце аб гэтым у міліцыю. Праваахоўнікі рэкамендуюць запомніць месца, дзе гэта адбылося, паспрабаваць знайсці сведкаў здарэння, запісаць іх нумары тэлефонаў і адрасы. Нялішнім будзе размясціць інфармацыю аб украдзеным транспартным сродку ў інтэрнэце — з яго фотаздымкамі і характарыстыкамі. Неабходна паведаміць аб крадзяжы сваім знаёмым: магчыма, веласіпед трапіць камусьці з іх на вочы. Не забывайцеся і самі праглядаць аб'явы аб продажы ужываных веласіпедаў — ёсць выпадкі, калі грамадзяне такім чынам самі знаходзяць сваю ўкрадзеную маёмасць. У гэтым выпадку не трэба дамагацца справядлівасці самастойна, лепш звярнуцца ў міліцыю.
Вераніка КАНЮТА
Спасылкі
[1] https://zviazda.by/be/tags/veranika-kanyuta
[2] https://zviazda.by/be/gramadstva
[3] https://zviazda.by/be/tags/kradzezh
[4] https://zviazda.by/be/tags/kryminal
[5] https://zviazda.by/be/tags/velasiped