У працэсе камунікацыі чалавек выкарыстоўвае два каналы перадачы інфармацыі: вербальны — моўны і невербальны — мова цела. Хада, міміка, жэсты... Невербальна інфармацыя пра вас сапраўднага перадаецца ў навакольнае асяроддзе і робіць уражанне яшчэ да таго, як будуць вымаўлены першыя словы. Па меркаванні экспертаў жэсты — дэтэктар праўды. Часам дастаткова аднаго погляду, каб зразумець, што сабою ўяўляе чалавек. Як зрабіць мову цела падуладнай самакантролю? І як навучыцца ёю кіраваць? У аснове «ТРЫ ЭС»: саманазіранне, самааналіз, самакантроль. Давайце разбярэмся, пра што «гаворыць» цела чалавека і як выправіць недахопы, калі яны ёсць?

ВЫПРАЎКА

Найважнейшы элемент мовы цела. Сутуласць, заціснутая грудная клетка кажуць аб няўпэўненасці, слабасці і стомленасці. Амплуа асуджанасці і ахвяры сёння не ў модзе, таму давядзецца папрацаваць над сабой.

ПРАКТЫКАВАННЕ

Па-першае, распраўце плечы. Па-другое, вазьміце кнігу. Менавіта гэты прадмет дапаможа палепшыць выпраўку. Пакладзіце кнігу на галаву і пацягніце макушкай уверх. З кнігай на галаве вы можаце хадзіць, прысядаць, уставаць, глядзець у тэлефон, спрабаваць дастаць што-небудзь з сумкі. Пачніце з пяць хвілін у дзень і паступова павялічвайце час трэніроўкі. Вы не толькі ўбачыце, што кніга стала радзей падаць, але і адчуеце сябе больш упэўнена.

ХАДА

Нахіл галавы, шырыня кроку, падскокванне ці, наадварот, убіванне кроку ў зямлю, празмернае размахванне рукамі... Усё гэта выдае ў чалавеку залішняя напруга і трывожнасць. Навучыцеся хадзіць спакойна, атрымліваючы задавальненне ад кожнага руху.

ПРАКТЫКАВАННЕ

Для пачатку запомніце: у вольным целе ўпэўненая хада. Вызваліцца ад заціскаў можна пры дапамозе практыкавання «Расслабленне праз напругу». Зыходнае становішча: ногі на шырыні плячэй, рукі ўздоўж цела. На ўдыху напружце сябе ад макушкі да пятак. Утрымлівайце напружанне на працягу 10-15 секунд, а затым паслабцеся, выпусціўшы корпус наперад. Паўтарыце гэтае практыкаванне тры-пяць разоў, пакуль не адчуеце, як прыемнае цяпло разліваецца па вашым целе. Ідзем далей! Плечы распраўлены і расслаблены, грудзі наперад. У абутку без абцасаў патрэніруйце крок з пяткі, а не з наска. Зафіксуйце аптымальную для вашага росту шырыню кроку. Не семяніце і не шморгайце! Не забывайцеся на плаўныя рухі рук. Усё павінна быць арганічна! Жанчынам не перашкодзіць патрэніраваць хаду ад сцягна.

ПОГЛЯД

Прааналізуйце, куды вы глядзіце падчас размовы ці публічнага выступлення: уніз, у падлогу, на суразмоўца? А можа быць унутр сябе? Навучыцеся глядзець адрасна, у вочы чалавека, бо стасункі пачынаюцца менавіта з кантакту вачыма.

ПРАКТЫКАВАННЕ

Папрасіце блізкага чалавека дапамагчы вам. Калі побач нікога не аказалася, можна скарыстацца люстэркам. Распавядаючы верш, анекдот ці гісторыю з жыцця, імкніцеся глядзець на суразмоўніка. Не бойцеся расстаўляць акцэнты ў сваёй прамове або рабіце паўзы. Ветлівая ўсмешка і ледзь прыкметны ківок галавы таксама не перашкодзяць. Праявіце настойлівасць, пераадолейце страх, знайдзіце свайго «асабістага гледача», і ён абавязкова адкажа вам узаемнасцю.

ЖЭСТЫ

Паказваць пальцам брыдка! Гэта з дзяцінства ведаюць усё. Справа ў тым, што палец — гэта працяг кулака, які сімвалізуе пагрозу і агрэсію. Адмоўцеся ад такога жэсту на карысць далоні.

ПРАКТЫКАВАННЕ

Акуратна збярыце пальцы і адкрыйце далонь. Гэтае дзеянне зробіць жэст добразычлівым. Прайграйце сітуацыі, калі вам неабходна штосьці паказаць. Пры дапамозе зачыненай далоні, накіраванай у падлогу, вы можаце інтэлігентна падкрэсліць свой статус, стварыць дыстанцыю паміж сабой і суразмоўцам ці паказаць, куды перамясціць той ці іншы прадмет.

Працуйце над сабой, і няхай невербальны бок вашай асобы заўсёды гаворыць на мове паспяховасці!

Кацярына ТУМАС-ЦІШКЕВІЧ

Фота pixabay.com