Валейбалісткі «Мінчанкі» атрымалі другую перамогу запар у рэгулярным чэмпіянаце жаночай Расійскай Суперлігі, паведамляе [1] БелТА.
У дзесятым матчы сезона нашы дзяўчаты сустракаліся на выездзе з аўтсайдарам чэмпіянату Расіі падмаскоўным клубам «Зарэчча-Адзінцова». «Мінчанка» не аддала саперніцам ніводнага сэта, але дадзеную перамогу наўрад ці можна назваць лёгкай: у кожнай з трох партый перавага беларусак не перавышала пяці ачкоў. Фінальны лік — 3:0 (26:24, 25:22, 25:20) на карысць падапечных Сяргея Юркіна.
Дзякуючы гэтаму поспеху «Мінчанка» замацавалася ў зоне плэй-оф жаночай расійскай Суперлігі, наша каманда з 14 ачкамі размяшчаецца на 8-м месцы сярод 14 каманд турніру, адрыў ад 9-га радка складае 5 балаў. Наступны матч у чэмпіянаце Расіі беларускі правядуць 11 снежня дома супраць «Спарты» з Ніжняга Ноўгарада, якая ідзе ў табліцы 11-й.
У суботу першую перамогу ў мужчынскі расійскай Суперлізе паспрабуе атрымаць сталічны «Будаўнік». У Палацы спорту «Уручча» мінчане прымуць Краснаярскі «Енісей», пачатак гульні — у 16.30.
Прэв’ю: pixabay.com
Спасылкі
[1] https://www.belta.by/sport/view/volejbolistki-minchanki-oderzhali-pobedu-v-matche-rossijskoj-superligi-538047-2022/
[2] https://zviazda.by/be/tags/minchanki
[3] https://zviazda.by/be/tags/rasiyskaya-superliga
[4] https://zviazda.by/be/tags/valeybol