У Выдавецкім доме «Звязда» ёсць кніжная серыя «Школьная бібліятэка класікі», у якой выходзяць творы, адрасаваныя школьнікам і настаўнікам, творы, якія ўваходзяць у праграму пазакласнага альбо дадатковага чытання, творы, якія вывучаюць у тым ліку і па праграме. Кнігі з гэтага праекта, у адрозненне ад блізкай па назве серыі — «Школьнай бібліятэкі», якая трапляе толькі ў бібліятэкі агульнаадукацыйнай школы, можна набыць па ўсіх кнігарнях краіны.
Навінка са «Школьнай бібліятэкі класікі» — зборнік з дзвюх п’ес: неўміручай «Несцеркі» Віталя Вольскага і вядомага меладраматычнага твора «Кім» Аляксея Дударава. Наклад выдання — 2000 экзэмпляраў.
Нагадаем, што п’еса В. Вольскага напісана ў 1940 годзе. Першая пастаноўка адбылася на гастролях БДТ — 2 у самы пярэдадзень Вялікай Айчыннай вайны: 18 мая 1941 года ў Петразаводску. У 1946 годзе пастаноўка адзначана Сталінскай прэміяй. Экранізіравана п’еса ў 1955 годзе. Камедыя «Несцерка», якая заснавана на матэрыяле беларускіх народных казак, паказвае народнага самародка Несцерку, здольнага абдурыць паноў і заўсёды гатовага прыйсці на падмогу простаму люду. На сцэне ролю галоўнага героя п’есы выконвалі вядомыя беларускія акцёры — Аляксандр Ілынскі і Фёдар Шмакаў (амаль паўвека Несцерка быў шмакаўскім!). Што датычыць экранізацый, то ў «Несцеркі» іх было ажно тры — у 1955, 1980 і 2013-м...
П’еса лаўрэата Дзяржаўнай прэміі СССР, Прэміі Саюзнай дзяржавы Беларусі і Расіі ў галіне літаратуры і мастатцтва Аляксея дударава «Кім» — пра падлетка, які шукае сродкі, каб вылечыць сваю названую сястру ад цяжкай хваробы. Вельмі драматычны і цікавы, напружаны па сваёй дынаміцы твор.
Сёлета ў Выдавецкім доме «Звязда» усяго запланаваны да выдання чатыры кнігі ў серыі «Школьная бібліятэка класікі».
Кастусь ЛЕШНІЦА
Спасылкі
[1] https://zviazda.by/be/author/kastus-leshnica
[2] https://zviazda.by/be/kultura
[3] https://zviazda.by/be/litaratura
[4] https://zviazda.by/be/tags/alyaksey-dudarau
[5] https://zviazda.by/be/tags/vital-volski-0
[6] https://zviazda.by/be/tags/fyodar-shmakau
[7] https://zviazda.by/be/tags/vydavecki-dom-zvyazda-2
[8] https://zviazda.by/be/tags/nescerka
[9] https://zviazda.by/be/tags/alyaksandr-ilinski
[10] https://zviazda.by/be/tags/bdt-2