Ужо ў жніўні любы ахвотны зможа наведаць адно са старэйшых нашых прадпрыемстваў піваварнай галіны. Адкрытае акцыянернае таварыства "Крыніца", падобна чэшскім піваварням, плануе наладзіць у сябе на прадпрыемстве платныя экскурсіі з дэгустацыяй.
— Любы, хто пажадае, павінен мець магчымасць убачыць вытворчы працэс аднаго з буйнейшых, кансерватыўных, старэйшых прадпрыемстваў Беларусі, — кажа генеральны дырэктар таварыства "Крыніца" Рыгор ПЯТКЕВІЧ. — Сёння мы пастаянна вядзём работу па нарошчванні магутнасцяў. Попыт унутры нашай краіны абмежаваны, і сёння, на жаль, не расце. У тым ліку з-за пастаяннага росту акцызаў. А вось попыт на замежных рынках расце пастаянна. Таму да наступнага летняга сезона мы плануем прыцягнуць замежныя інвестыцыі і ўсталяваць яшчэ адну лінію па вырабе піва. Для ўнутранага рынку ўжо ў гэтым цёплым сезоне прапануем новы гатунак больш шчыльнага квасу браджэння "Лета 988". Згодна з легендай, гэта год нараджэння напою, які супаў з часам хрышчэння Русі
. Выпускаем з чэрвеня і безалкагольны прадукт з сокам чарніц, лясной маліны і журавін...
Апошнія гадоў дзесяць таварыства "Крыніца" развівалася толькі за кошт крэдытаў, а таму ўсе заробленыя сродкі ішлі на іх пагашэнне. Зараз жа, як адзначаюць на прадпрыемстве, ёсць патрэба ў прамых уліваннях — дзяржаўных або замежных інвестараў. Гэтыя ўліванні не прападуць задарма, паколькі такія гатункі, як "Крыніца светлае", "Крыніца класіка", "Александрыя", "Kult Пшанічнае", высока адзначаны на міжнародных конкурсах. Найбольш актыўна піўная прадукцыя адгружаецца ў Расію, Казахстан, Прыбалтыку, ва Украіну. Вядуцца перамовы нават з Польшчай, куды сёння складана прабіцца беларускім піваварам.
Спадар Пяткевіч перакананы, што валодае лепшым патэнцыялам у галіне па забеспячэнні якасці прадукцыі. А начальнік упраўлення вытворча-тэхнічнай дзейнасці Ірына КАРЧЭЎСКАЯ нагадвае, што піва на "Крыніцы" вырабляецца паводле класічных традыцый: "У піўным ячмені павінна быць не больш за 12 працэнтаў бялку. Чым менш, тым, вядома, лепш, паколькі бялок пазней неабходна выдаліць — падчас гатавання, адстойвання... Зерне, якое мы набываем, — беларускае, прычым як дзяржаўнае прадпрыемства мы маем пэўныя прэферэнцыі па адборы ўраджаю падчас уборачнай. Намочаны, прарошчаны і высушаны ячмень — гэта солад. Ячменны солад — класіка для вытворчасці піва. Хоць сёння вытворцы імкнуцца пашыраць колькасць гатункаў піва і дадаюць іншыя зернепрадукты, дазволеныя для вырабу напою. Гэта можа быць рыс. Мы працуем толькі на соладзе. Адзін гатунак вырабляем з соладу пшанічнага. Апошнім часам удаецца атрымліваць свой дастойны пшанічны солад".
Святлана БАРЫСЕНКА.
Спасылкі
[1] https://zviazda.by/be/tags/svyatlana-barysenka
[2] https://zviazda.by/be/gramadstva
[3] https://zviazda.by/be/infarmbyuro
[4] https://zviazda.by/be/tags/rasiya
[5] https://zviazda.by/be/tags/ukraina
[6] https://zviazda.by/be/tags/kazahstan
[7] https://zviazda.by/be/tags/polshcha
[8] https://zviazda.by/be/tags/adkrytae-akcyyanernae-tavarystva-krynica
[9] https://zviazda.by/be/tags/generalny-dyrektar-tavarystva-krynica-rygor-pyatkevich
[10] https://zviazda.by/be/tags/hryshchennya-rusi
[11] https://zviazda.by/be/tags/krynica-svetlae
[12] https://zviazda.by/be/tags/krynica-klasika
[13] https://zviazda.by/be/tags/aleksandryya
[14] https://zviazda.by/be/tags/kult-pshanichnae
[15] https://zviazda.by/be/tags/prybaltyka
[16] https://zviazda.by/be/tags/iryna-karcheuskaya