Сёння афіцыйна стартуе ХХІІ Міжнародны фестываль мастацтваў "Славянскі базар у Віцебску". Урачыстае адкрыццё фэсту №1 распачнецца ў Летнім амфітэатры ў 20.30. Гэтая галоўная сцэнічная пляцоўка "базару" сёлета, нагадаю, з'яўляецца юбілярам: амфітэатру — роўна 25 гадоў!
Учора ў рамках ХІ Міжнароднага дзіцячага музычнага конкурсу "Віцебск-2013" выступілі, сярод іншых, і нашы зямлячкі, юныя беларускі Апалінарыя і Аляксандра Лакціёнава. Дзяўчынкам з Мінска па 11 гадоў, але ў іх ужо вельмі вялікі вопыт выступленняў на розных конкурсах і фэстах.
Апалінарыя, напрыклад, у 2011 годзе атрымала званне лаўрэата ІІІ ступені Міжнароднага фестывалю дзіцячай творчасці "Залатая пчолка". Летась стала лаўрэатам І ступені першага адкрытага конкурсу мастацтваў "Ззянне талентаў". У студзені бягучага года заваявала Гран-пры Міжнароднага моладзевага конкурсу-фестывалю вакальнага, харэаграфічнага і цыркавога мастацтваў "Брыльянт Карпат" (Украіна)...
Аляксандра — выхаванка Нацыянальнага цэнтра музычнага мастацтва імя Уладзіміра Мулявіна
пад кіраўніцтвам Святланы Стацэнка. Дзяўчынка — пераможца рэспубліканскага тэлевізійнага дзіцячага конкурсу "Я спяваю", лаўрэат І ступені ХІV адкрытага конкурсу выканаўцаў новай дзіцячай песні "Дзень нараджэння", VІІ Міжнароднага фестывалю юных талентаў "Зямля пад белымі крыламі", Міжнароднага фестывалю эстраднай творчасці "Музычная карусель Санкт-Пецярбурга — 2012" і гэтак далей. Карэспандэнт "Звязды" пагутарыў з дзяўчынкамі.
— Мне на "базары" ўсё вельмі спадабалася, тут усё так цікава, — кажа Апалінарыя. — Была на розных конкурсах, але такога яшчэ не бачыла нідзе — ні ва Украіне, ні ў Азербайджане. Мне здаецца, наша Беларусь — самая лепшая краіна. Што да конкурсу, то ў мяне ёсць прыкмета: калі забалела горла, значыць, усё будзе вельмі добра. І горла забалела!
Аляксандра расказала, што яе талісманы — залаты анёлак і ключык, якіх яна носіць на шыі на ланцужку. Прыехала ў Віцебск з мамай і кіраўніком цэнтра музычнага мастацтва. Раней глядзела фестываль па тэлевізары.
— Пакуль няма ў мяне ўлюбёнага месца ў Віцебску. Унутранае хваляванне перад выступленнямі, безумоўна, ёсць, а так наогул не хвалююся. Проста забываю пра гэта, — прызналася Саша.
Сёлета Аляксандр Ціхановіч, народны артыст Беларусі, узначальвае журы конкурсу.
— Дзеці — заўсёды спецыфіка, вельмі складана і адказна судзіць творчасць дзяцей. Таму нам, членам журы, трэба будзе самім на нейкі час стаць дзецьмі. Без гэтага, думаю, немагчыма правільна ацэньваць выступленні юных канкурсантаў. Бадай кожны з членаў журы за плячыма мае вялікі вопыт выступаў, удзелу ў журы розных конкурсаў. Думаю, мы зможам аддаць сваю любоў і цеплыню кожнаму ўдзельніку, — сказаў ён.
Артыст з вялікай цеплынёй выказаўся пра юбілей Летняга амфітэатра: "Сёлета роўна 25 гадоў амфітэатру. Вы ведаеце, мне пашчасціла, што я бачу ўсе пераўтварэнні ў ім. Яшчэ з конкурсу польскай песні і да сённяшняга дня. І хочацца падзякаваць ад душы чалавеку, які шмат зрабіў для "базару" і амфітэатра — я пра былога дырэктара фэсту Радзівона Баса. Хацелася б, каб мы памяталі пра гэта і дзякавалі гэтаму чалавеку за прафесіяналізм, самаадданасць і любоў да мастацтва. Ён вельмі сумленны і сапраўдны служыцель мастацтва.
Папулярны спявак Яўген Гор сказаў, што ён упершыню з'яўляецца членам журы.
— Не сплю ўжо двое сутак. І не магу ўсвядоміць тое, што адбываецца: дзятвы куча, усё хадуном ходзіць, усё каляровае... Тут вельмі крута ўсё. Спадзяюся, адкрыю для сябе новыя імёны, — расказаў ён карэспандэнту "Звязды".
Я пацікавіўся ў спевака: ці паўплываў яго ўдзел у конкурсе "базару" ў 2004 годзе на ўласны творчы лёс?
— Вядома. І гэта быў адпраўны пункт майго творчага развіцця. Усё пачалося адсюль. Але, напэўна, нават не з "базару", а з конкурсу ў Магілёве — "Залаты шлягер". Ён яшчэ праходзіць да гэтага часу? Добра. Памятаю, я тады я прыехаў на першы такога ўзроўню міжнародны конкурс. І тады я атрымаў прыз глядацкіх сімпатый: уся Беларусь прагаласавала за мяне. А "базар" ужо паставіў канчатковую кропку, і для мяне сталі адкрытыя многія дарогі...
Гран-пры конкурсу — 5 тысяч долараў, 1-я прэмія — 3 тысячы долараў, 2-я прэмія — 2 тысячы долараў, 3-я прэмія — 1 тысяча ўмоўных адзінак.
Аляксандр ПУКШАНСКІ.
Спасылкі
[1] https://zviazda.by/be/tags/alyaksandr-pukshanski
[2] https://zviazda.by/be/muzyka
[3] https://zviazda.by/be/kultura-0
[4] https://zviazda.by/be/tags/belarus
[5] https://zviazda.by/be/tags/kultura
[6] https://zviazda.by/be/tags/zvyazda
[7] https://zviazda.by/be/tags/ukraina
[8] https://zviazda.by/be/tags/slavyanski-bazar-u-vicebsku
[9] https://zviazda.by/be/tags/vicebsk
[10] https://zviazda.by/be/tags/minsk
[11] https://zviazda.by/be/tags/slavyanski-bazar
[12] https://zviazda.by/be/tags/alyaksandr-cihanovich
[13] https://zviazda.by/be/tags/vicebsk-2013
[14] https://zviazda.by/be/tags/letni-amfiteatr
[15] https://zviazda.by/be/tags/alyaksandra-lakciyonava
[16] https://zviazda.by/be/tags/apalinaryya
[17] https://zviazda.by/be/tags/zalataya-pcholka
[18] https://zviazda.by/be/tags/zzyanne-talentau
[19] https://zviazda.by/be/tags/brylyant-karpat
[20] https://zviazda.by/be/tags/svyatlana-stacenka
[21] https://zviazda.by/be/tags/nacyyanalny-centr-muzychnaga-mastactva-imya-uladzimira-mulyavina
[22] https://zviazda.by/be/tags/ya-spyavayu
[23] https://zviazda.by/be/tags/dzen-naradzhennya
[24] https://zviazda.by/be/tags/zyamlya-pad-belymi-krylami
[25] https://zviazda.by/be/tags/muzychnaya-karusel-sankt-pecyarburga-2012
[26] https://zviazda.by/be/tags/radzivon-bas
[27] https://zviazda.by/be/tags/yaugen-gor