Вывучыць матэматыку... па скайпе
Механіка-матэматычны факультэт БДУ запрашае ўсіх ахвотных далучацца да дыстанцыйнага навучання ў Школе юных матэматыкаў, якое будзе даступнае на сайце www.dl.bsu.bу.
— Пакуль што дыстанцыйнае навучанне разлічана на адзінаццацікласнікаў, — расказаў дэкан механіка-матэматычнага факультэта БДУ Дзмітрый Мядзведзеў. — Дагэтуль у нас функцыянавала толькі бясплатная вочная школа для вучняў з 5-га па 11-ы класы. Адпаведна, на нашы заняткі рэальна было патрапіць толькі мінчанам. А дзякуючы дыстанцыйнаму навучанню цяпер падрыхтавацца да паступлення зможа школьнік з любога кутка краіны. І, вядома, такім спосабам мы хочам больш інфармацыі данесці пра наш факультэт. Многія мяркуюць, што студэнты, якія навучаюцца на мехмаце, — «батаны ў акулярах», якія толькі і робяць, што гартаюць падручнікі. Але гэта стэрэатып. Наш факультэт рыхтуе выдатных спецыялістаў у ІT-сферы, матэматыкаў-эканамістаў, навуковых супрацоўнікаў.
У чым жа заключаецца сутнасць навучання? На сайце змешчаны ўвесь курс элементарнай матэматыкі, які быў сістэматызаваны студэнтамі мехмата. У дадатак абітурыенты змогуць па спасылцы знайсці відэа-ўрокі з самымі вядомымі маскоўскімі настаўнікамі і выкладчыкамі. Акрамя тэорыі, на сайце будуць прапаноўвацца задачы для рашэння, а потым выкладвацца адказы да іх. Пасля праверкі кантрольных работ памылкі будуць тлумачыцца выкладчыкамі абітурыентам у індывідуальным парадку.
Таксама на сайце дыстанцыйнага навучання будзе дзейнічаць і форум. Такім чынам школьнікі змогуць навучацца ў працэсе камунікацыі. Да таго ж будуць выдзяляцца гадзіны, калі абітурыенты па скайпе змогуць асабіста паразмаўляць з выкладчыкамі і задаць ім свае пытанні.
Вікторыя ЧАПЛЕВА.
Будучых мытнікаў запрашаюць... у школу
«Школа будучага мытніка» будзе дзейнічаць у Белдзяржуніверсітэце з лістапада па сакавік. Гэта першыя ў Беларусі курсы, скіраваныя на падрыхтоўку абітурыентаў да прафесійна-псіхалагічнай гутаркі па спецыяльнасці «Мытная справа». Арганізатарам школы выступае кафедра мытнай справы факультэта міжнародных адносін БДУ.
Вучэбная праграма ўключае знаёмства слухачоў з гісторыяй, спецыфікай, функцыямі і асноўнымі напрамкамі дзейнасці супрацоўніка мытных службаў. Гэтыя веды дазволяць старшакласнікам не толькі псіхалагічна падрыхтавацца да гутаркі, але і вызначыцца з правільнасцю выбару будучай прафесіі.
Заняткі будуць весці выкладчыкі кафедры мытнай справы факультэта міжнародных адносін БДУ і супрацоўнікі Мінскай рэгіянальнай мытні. Перыядычнасць заняткаў — 2 разы на месяц. Навучанне бясплатнае. Пасля заканчэння слухачам будзе выдавацца сертыфікат, наяўнасць якога ўлічваецца камісіяй пры праходжанні афіцыйнай прафесійна-псіхалагічнай гутаркі. Папярэдні запіс па тэлефоне (017) 209 57 52.
Нагадаем, што прафесійна-псіхалагічную гутарку павінны прайсці ўсе абітурыенты, якія плануюць паступаць на спецыяльнасці «правазнаўства», «эканамічнае права», «дзяржаўнае кіраванне і права», «мытная справа», «журналістыка», «міжнародная журналістыка», «міжнародныя адносіны» і «міжнароднае права».
Праблемы з чытаннем «лечацца»
Электронныя прылады для чытання кніг (планшэты, рыдары) за кошт кароткіх радкоў на экране больш эфектыўныя для людзей з дыслексіяй (праблемамі з чытаннем), чым звычайныя кнігі — так лічаць амерыканскія навукоўцы, якія апублікавалі вынікі сваёй работы ў часопісе РLОS ОNЕ.
Дыслексія мае неўралагічную прыроду і праяўляецца ў няздольнасці хутка і правільна распазнаваць словы, засвойваць іх значэнне і навыкі правапісу. Пры такіх парушэннях у чалавека, які чытае, ёсць праблемы з разуменнем тэксту.
Навукоўцы параўналі поспехі ў чытанні з паперы і з дапамогай кішэннага камп'ютара ў старшакласнікаў, якія церпяць ад дыслексіі. Было ўстаноўлена, што школьнікі з дэфіцытам візуальнай увагі лепш і больш хутка працавалі з тэкстам на экране маленькай прылады, чым з тэкстам на паперы.
Даследчыкі мяркуюць, што менавіта кароткія радкі з невялікай колькасцю слоў (а не ўласна электронныя прылады) дапамагаюць засяродзіцца на канкрэтных значэннях, адсякаючы другасныя.
Надзея НІКАЛАЕВА.
Спасылкі
[1] https://zviazda.by/be/tags/nadzeya-nikalaeva
[2] https://zviazda.by/be/adukacyya
[3] https://zviazda.by/be/tags/dzmitryy-myadzvedzeu
[4] https://zviazda.by/be/tags/mehanika-matematychny-fakultet-bdu
[5] https://zviazda.by/be/tags/dystancyynaga-navuchanne
[6] https://zviazda.by/be/tags/shkola-yunyh-matematykau
[7] https://zviazda.by/be/tags/viktoryya-chaplevva
[8] https://zviazda.by/be/tags/fakultet-mizhnarodnyh-adnosin-bdu
[9] https://zviazda.by/be/tags/shkola-buduchaga-mytnika