Гэтыя кропкі зямнога шара ніколі не вылучаліся поспехамі на сусветных спартыўных арэнах, але сціплай хадой яны ўжо набліжаюцца да алімпа. Мы раскажам не пра лідараў медальнага заліку — ЗША, Кітай і Вялікабрытанію, а пра малавядомыя ў спартыўным свеце краіны, якія маюць у сваёй скарбонцы алімпійскія медалі.
Філіпіны ўпершыню паўдзельнічалі ў летніх Алімпійскіх гульнях у далёкім 1924 годзе ў Парыжы і з тых часоў не прапусцілі ніводнай летняй Алімпіяды, акрамя Гульняў у Маскве ў 1980 годзе. Атлеты Філіпінаў да Гульняў-2016 заваявалі 9 алімпійскіх узнагарод: 2 сярэбраныя і 7 бронзавых. На п'едэстал філіпінцы падымаліся ў спаборніцтвах па лёгкай атлетыцы, плаванні і боксе. Сёлета да вышэйзгаданага камплекта дадалася яшчэ адна ўзнагарода, яе здабыла цяжкаатлетка Хідылін Дыяс, якая выйграла «серабро».
Малайзія дэбютавала на Алімпійскіх гульнях крыху пазней — у 1964 годзе. І таксама, як і Філіпіны, не прапускала Гульні, за выключэннем маскоўскіх. Спартсмены гэтай краіны ніколі не прымалі ўдзел у зімовых Алімпіядах, а на летніх за ўсю гісторыю заваявалі 6 узнагарод.
У Бразіліі ўжо паспелі вызначыцца Чэонг Юн Хунг і Пандэлела Рынонг, на іх рахунку сярэбраныя алімпійскія ўзнагароды па скачках у ваду.
Манголія ўпершыню прыняла ўдзел у Алімпійскіх гульнях у 1964 годзе. З тых часоў краіна ўдзельнічала ва ўсіх летніх Алімпійскіх гульнях, акрамя Алімпіяды-1984, калі падтрымала байкот, прапанаваны СССР.
У Бразіліі на рахунку мангольскай зборнай ужо ёсць адна сярэбраная ўзнагарода, яе для сваёй каманды заваявала дзюдаістка Сумія Даршурэн у катэгорыі да 57 кг.
Дар'я ЛАБАЖЭВІЧ
Спасылкі
[1] https://zviazda.by/be/tags/darya-labazhevich
[2] https://zviazda.by/be/sport
[3] mailto:lobazhevich@zviazda.by
[4] https://zviazda.by/be/tags/alimpiyskiya-gulni-2016
[5] https://zviazda.by/be/tags/filipiny
[6] https://zviazda.by/be/tags/malayziya
[7] https://zviazda.by/be/tags/mangoliya
[8] https://zviazda.by/be/tags/alimpiec