Фестываль нацыянальных культур «Мы розныя-мы разам!» прайшоў у мінскім гандлёвым цэнтры «Сталіца».
У гэтым свяце нацыянальнасцяў прыняла ўдзел студэнцкая моладзь жылога комплексу «Студэнцкая вёска» з Беларусі, Кітая, Узбекістана, Туркменістана, Іспаніі, ПАР і Расіі. Хлопцы і дзяўчаты праходзяць навучанне ў 9-ці сталічных ВНУ.
Арганізатарам фестывалю з’яўляецца Студэнцкі савет жылога комплексу «Студэнцкая вёска», створаны пры Адміністрацыі Маскоўскага раёна г. Мінска, Мінскі дзяржаўны лінгвістычны ўніверсітэт, Упраўленне ідэалагічнай работы, культуры і па справах моладзі адміністрацыі Маскоўскага раёна г. Мінска.
У рамках фестывалю былі прадстаўлены тэматычныя інтэрактыўныя пляцоўкі «Нацыянальны каларыт» і выставы арт-аб’ектаў. Свае творчыя выступленні «Культурная і гістарычная спадчына краіны» прадставілі беларускія і замежныя студэнты. Завяршылася мерапрыемства творчым выступленнем моладзі ўсіх краін-удзельніц і падвядзеннем вынікаў конкурсных заданняў.
Падчас конкурсных выступленняў панавала сяброўская атмасфера і хлопцы і дзяўчаты розных нацыянальнасцяў актыўна падтрымлівалі адзін аднаго.
Віктар ДРАЧОЎ
Фота аўтара
