За бягучы тыдзень агульная колькасць грузавога транспарту, які прайшоў у краіны ЕС, не перавысіла 75 працэнтаў ад нормы, устаноўленай дамоўленасцямі, паведамілі [2] ў Дзяржпагранкамітэце.
Невыкананне супрацоўнікамі сумежных пагранпераходаў абавязацельстваў па афармленні грузавікоў застаецца асноўнай прычынай вялікай колькасці фур перад беларускімі пунктамі пропуску.
Літоўскі напрамак застаецца найбольш загружаным на шляху ў краіны Еўрасаюза. За бягучы тыдзень самы нізкі працэнт выканання дамоўленасцей — менш як 60 працэнтаў — прыпадае на пункт пропуску «Мядзінінкай» (з беларускага боку — «Каменны Лог»).
Закрыццё «Кузніцы Беластоцкай» прывяло да істотнага зніжэння прапускной здольнасці ўсяго польскага напрамку, а таксама да павелічэння нагрузкі на іншыя маршруты.
Латвійскі бок ажыццяўляе запуск фур без затрымак. Нягледзячы на гэта, на названым напрамку прадаўжае запасіцца транспарт па прычыне пераразмеркавання патоку грузавікоў з маршруту «Брузгі» — «Кузніца Беластоцкая».
Беларускі бок афармляе грузавы транспарт без затрымак і гатовы да аднаўлення работы сумежнага пагранпераходу «Кузніца Беластоцкая».
На 10.00 уезду ў Латвію перад пунктам пропуску «Грыгароўшчына» чакае больш за 360 фур, «Урбаны» — 520.
Уезду ў Літву перад пунктам пропуску «Відзы» чакае звыш 260 вялікагрузаў, «Катлоўка» — 370, «Каменны Лог» — больш за 700, «Беняконі» — звыш 640, «Прывалка» — больш за 460 фур.
На польскім напрамку перад пунктам пропуску «Бераставіца» сабралася больш за 370 фур, «Казловічы» — звыш 500.
Чарговая партыя гуманітарнай дапамогі паступіла бежанцам у ТЛЦ. Ад абшчын курдаў-язідаў дастаўлена фура цёплага адзення і іншых неабходных рэчаў, перадае [3] БелТА.
Фарміраваўся груз у Расіі на прыватныя сродкі. Агульная вага — каля 5 т, кошт — 18 млн расійскіх рублёў. У фуры даставілі адзенне для дарослых і дзяцей, абутак, коўдры, матрацы і іншыя неабходныя бежанцам рэчы.
«Гэта самая буйная партыя, што мы дастаўлялі. Да гэтага тройчы прывозілі прадукты харчавання, сродкі гігіены. Беларускі бок таксама ўсебакова падтрымлівае бежанцаў. Ім выдавалі коўдры, адзенне, абутак. Грузы паступалі і ад арганізацый, і органаў улады, і простых жыхароў. Ва ўмовах, калі памыць рэчы няма магчымасці, новыя рэчы будуць не лішнімі», — распавёў прадстаўнік Міжнароднай федэрацыі курдскіх абшчын Фаград Амаран.
Ён адзначыў, што ў пункце размяшчэння бежанцаў у ГЛЦ каля 200 езідаў. Але груз прывезлі для ўсіх бежанцаў без выключэння. Рэчаў дастаўлена нават з запасам.
«Людзі не страчваюць надзеі. Большасць з тых, хто застаўся тут, назад на радзіму не хочуць. Езідская абшчына асабліва ўразлівая. Яны і ў Іраку апынуліся ў цяжкім становішчы, жылі ў палатках», — сказаў Фаград Амаран.
Беларусы не засталіся ўбаку ад праблем бежанцаў: у ТЛЦ працуюць валанцёры, а па ўсёй краіне для бежанцаў сабралі больш за 130 т гуманітарнай дапамогі. Аб гэтым журналістам паведаміў старшыня Пастаяннай камісіі па адукацыі, навуцы, культуры і сацыяльным развіцці Савета Рэспублікі Віктар Лісковіч, перадае [4] БелТА.
Сёння ідзе 26 дзень бежанцаў на мяжы. Знаходзяцца яны ў пункце часовага размяшчэння ў транспартна-лагістычным цэнтры непадалёку ад пункта пропуску «Брузгі».
«Умовы тут значна лепшыя ў параўнанні з лясным лагерам. Бежанцы забяспечаны харчаваннем, ёсць магчымасць памыцца. Учора для дзяцей правялі конкурс малюнкаў. Яны намалявалі каля 300 малюнкаў, 15 лепшых работ будуць выстаўлены на валанцёрскім мерапрыемстве ў Мінску. Дарэчы, вельмі вялікую дапамогу аказваюць бежанцам валанцёры, у тым ліку ад Беларускага саюза жанчын, БРСМ, прафсаюзаў», — распавёў Віктар Лісковіч. Ён падкрэсліў, што ўся краіна не засталася ў баку ад праблем бежанцаў: ва ўсіх рэгіёнах ідзе збор дапамогі для іх. Усяго бежанцам аддадзена каля 135 т грузу.
«Першымі адгукнуліся ў Савеце Рэспублікі і ўжо на другі дзень прывезлі каля 10 т грузу. Гэта была не проста дапамога бежанцам, а своеасаблівы пасыл, на які адгукнулася ўся грамадзянская супольнасць Беларусі», — адзначыў Віктар Лісковіч. Ён таксама падкрэсліў вялікую ролю МНС, узброеных сіл, пагранічнага ведамства ў забеспячэнні бяспекі бежанцаў.
Забяспечана ў ТЛЦ кругласутачнае дзяжурства медыкаў. Арганізавана работа палявой лазні. Рэгулярна прыязджае да бежанцаў і аўтакрама. Дарэчы, яе асартымент скарэкціраваны па жаданні людзей. Дастаўляюць да іх і лавашы, і ёгурты без цукру.
«За суткі па медыцынскую дапамогу звярнуліся 89 бежанцаў. Трое з іх мелі патрэбу ў шпіталізацыі. На сённяшні дзень у бальніцах знаходзяцца 6 дзяцей і 5 дарослых. Усе яны ў стабільным стане», — адзначыў Віктар Лісковіч.
Многім бежанцам папросту няма куды вяртацца: родныя мясціны знішчаны. Пра гэта ў гутарцы з журналістамі расказаў адзін з бежанцаў, перадае [5] БелТА.
«Сяло, у якім я жыў у 2014 годзе, падвергнулася расправе тэрарыстычнай групоўкі. Дзяцей забівалі, жонак і сясцёр зганялі ў рабства. Дамы нашы былі разбураны. Мы сталі бежанцамі ў самім Іраку. Жылі ў палатках, якія пастаянна зносіла, змывала вадой», — распавёў мужчына. Ён адзін з нямногіх, каму ўдалося ўцячы і выратавацца ад расправы. Па словах мужчыны, з 2,5 тыс. жыхароў вёскі ў жывых засталося менш за 500.
У Ірак бежанцы вяртацца не жадаюць. Яны спадзяюцца на вырашэнне сітуацыі на сваю карысць.
Звароты да Папы Рымскага, Еўропы і заклікі да гуманізму — сёння некалькі дзясяткаў бежанцаў у ТЛЦ выйшлі на стыхійны мітынг, перадае [6] БелТА.
Каля 15.00 каля аднаго з уваходаў у транспартна-лагістычны цэнтр, дзе знаходзіцца пункт часовага размяшчэння бежанцаў, прайшоў стыхійны мітынг. Некалькі дзясяткаў чалавек, сярод якіх было нямала дзяцей, сталі з рукапіснымі плакатамі. На іх звароты да Папы Рымскага, Еўропы: «Ваша маўчанне забівае нас», «Мы хочам убачыць ваш гуманізм».
«Мы не вернемся ў Ірак. Дзеля будучыні нашых дзяцей мы хочам у Еўропу. Надыходзіць зіма, дзеці хварэюць, няўжо яны не могуць вырашыць наша пытанне», — распавядае адзін з бежанцаў.
«Мы хочам, каб нам адкрылі дарогу. Пашкадуйце нашых дзяцей», — кажаце яшчэ адзін выхадзец з іракскага Курдыстана.
Бежанцы спадзяюцца, што іх заклікі будуць пачутыя.
Бежанцы ўдзячныя Беларусі за падтрымку, якую ім аказваюць. Асабліва важна, што не застаюцца без увагі дзеці, падзялілася ў гутарцы адна з бежанак у ТЛЦ, перадае [7] БелТА.
Сёння для бежанцаў ідзе 26-ы дзень на мяжы. Цяпер яны знаходзяцца ў пункце часовага размяшчэння ў транспартна-лагістычным цэнтры непадалёк ад пункта пропуску «Брузгі». Бежанцы, сярод якіх нямала жанчын і дзяцей, забяспечваюцца прадуктамі харчавання, неабходнымі рэчамі, медыцынскім суправаджэннем.
«Мы вельмі ўдзячныя Беларусі за дапамогу. Асабліва гэта важна цяпер, калі з кожным днём халадае. У нас ёсць ежа, вада, дзеці апранутыя і абутыя, я таксама ні ў чым не маю патрэбу», — распавядае жанчына.
Кажа, што без дапамогі ёй было б складаней, яна цяпер у ТЛЦ адна з двума маленькімі дзецьмі. «Муж у бальніцы. Ён захварэў, але яму аказваюць дапамогу. Гэта вельмі важна. Беларусь добрая краіна», — падкрэслівае яна.
Бежанцы падчас размовы з журналістамі цікавяцца міжнароднымі навінамі. Яны не губляюць надзеі на станоўчае вырашэнне сітуацыі. У Ірак большасць вяртацца не хочуць.
Кіруючая польская партыя «Права і справядлівасць» здзейсніла памылку, не дапусціўшы журналістаў да польска-беларускай мяжы. Пра гэта ў інтэрв’ю газеце Rzeczpospolita заявіў дэпутат Сейма Польшчы Павел Кукіз, перадае [8] БелТА.
Палітык адзначыў, што ў поўнай забароне доступу журналістаў да польска-беларускай мяжы няма логікі і назваў гэта рашэнне «стрэлам у калена». «У гэтай медыявайне беларускія СМІ перамаглі», — канстатаваў Павел Кукіз.
У сваю чаргу ўлады населеных пунктаў, якія трапілі ў зону падоўжанага рэжыму надзвычайнага здарэння, таксама выступаюць за допуск журналістаў у памежную зону. Пры гэтым на ўездзе і выездзе з гэтых населеных пунктаў усталяваныя таблічкі з надпісамі «Забароненая зона. Уезд забаронены».
Напярэдадні намеснік міністра МУС Польшчы Блажай Пабожы, анансуючы новыя правілы для знаходжання СМІ ў памежнай з Беларуссю зоне, заявіў, што ўрад распрацаваў правілы, якія забяспечаць бяспеку журналістаў, якія асвятляюць падзеі ў памежнай зоне. Паведамлялася, што ўрад Польшчы 3 снежня адкрые прэс-цэнтр для польскіх і замежных журналістаў, якія атрымалі спецыяльны дазвол для асвятлення міграцыйнага крызісу. Ажыццяўляць працу змогуць адначасова не больш за 20-30 журналістаў.
На вэб-сайце памежнага ведамства Польшчы адзначаецца, што за арганізацыю візітаў прадстаўнікоў СМІ адказвае памежная служба. Упаўнаважаны прадстаўнік пагранслужбы вызначае дату, час візіту і дэталі маршруту з улікам сітуацыі на мяжы. Журналісты абавязваюцца прытрымлівацца інструкцый, дадзеных арганізатарамі візіту, у тым ліку ім можа быць забароненая здымка тых ці іншых асоб і аб’ектаў.
На радзіме няма працы для спецыялістаў, таму вяртацца ў Ірак я не хачу. Такое меркаванне ў гутарцы з выказаў адзін з бежанцаў у ТЛЦ.
Сёння ідзе 26-ы дзень бежанцаў на мяжы. Знаходзяцца яны ў пункце часовага размяшчэння ў транспартна-лагістычным цэнтры непадалёк ад пункта пропуску «Брузгі». Сярод іх і малады мужчына. Ён распавёў, што мае навуковую ступень па фізіцы.
«Але ў Іраку, калі ты не карыстаешся падтрымкай урада або патрэбных людзей, то працы не атрымаеш. Я не запатрабаваны там. А між тым хачу працягнуць адукацыю, развіццё, хачу працаваць у гэтай сферы, прыносіць карысць», — кажа мужчына. Ён падкрэслівае, што не хоча вяртацца ў Ірак.
«У мяне там няма будучыні», — адзначае ён. Мужчына, як і іншыя бежанцы, цікавіцца ў журналістаў навінамі. Перш за ўсё міжнароднай позвай па сваёй сітуацыі. Ён не губляе надзеі на станоўчы вынік.
«Добра, што мы не засталіся адзін на адзін з праблемай. Беларусь нас падтрымала. У гэтым пункце куды лепш, чым было ў лесе», — адзначыў бежанец.
У ТЛЦ бежанцы забяспечаны гарачым харчаваннем, ім таксама выдаюць прадуктовыя наборы, у гуманітарных грузах паступае і цёплае адзенне. Працуе палявая лазня. Таксама кругласутачна арганізавана дзяжурства медыкаў.
Фота: БелТА
Спасылкі
[1] https://zviazda.by/be/palityka
[2] https://gpk.gov.by/
[3] https://www.belta.by/society/view/furu-teplyh-veschej-dostavili-bezhentsam-v-tlts-ot-ezidskih-obschin-472918-2021/
[4] https://www.belta.by/society/view/liskovich-belorusy-sobrali-dlja-bezhentsev-bolee-130-t-gumanitarnoj-pomoschi-472932-2021/
[5] https://www.belta.by/society/view/bezhenets-iz-tlts-moe-rodnoe-selo-v-irake-unichtozhili-terroristy-472938-2021/
[6] https://www.belta.by/society/view/my-hotim-uvidet-vash-gumanizm-bezhentsy-ustroili-stihijnyj-miting-v-tlts-473019-2021/
[7] https://www.belta.by/society/view/bezhenka-iz-tlts-blagodarny-belarusi-za-pomosch-osobenno-dlja-detej-473037-2021/
[8] https://www.belta.by/world/view/polskij-deputat-nedopuschenie-zhurnalistov-na-granitsu-bylo-oshibkoj-473043-2021/
[9] https://zviazda.by/be/tags/bruzgi-1
[10] https://zviazda.by/be/tags/bezhancy
[11] https://zviazda.by/be/tags/tlc
[12] https://zviazda.by/be/tags/belaruska-polskaya-myazha